سوشل میڈیا پر حالیہ دنوں ایک سکھ گلوکارہ زارا گل کی جانب سے پاکستان کے لیے محبت اور خیرسگالی کے جذبات پر مبنی گانا تیزی سے وائرل ہو رہا ہے، جس نے بھارت میں خاصی بحث چھیڑ دی ہے۔

سکھ گلوکارہ کی جانب سے گائے گئے گانے میں پاکستان کے لیے مثبت جذبات کا اظہار کیا گیا، جس پر مودی حکومت نے سخت ردِعمل دیتے ہوئے گانے پر پابندی عائد کر دی ہے۔

مذکورہ گانا بابا گرو نانک کے مقدس مقام پر پاکستان کی جانب سے فراہم کی گئی مہمان نوازی اور بین المذاہب ہم آہنگی کو خراجِ تحسین پیش کرنے کے لیے تخلیق کیا گیا تھا۔

 گانے کے دل کو چھو لینے والے بول “اسیں مُردہ باد نئیں کہہ سکدے بُھل کے وی پاکستان نوں” نے نہ صرف سوشل میڈیا صارفین بلکہ دونوں ممالک کے امن پسند حلقوں کی توجہ بھی حاصل کی اور اس کا مفہوم ہے “ہم پاکستان کو بھول کر بھی مردہ باد نہیں کہہ سکتے۔”

مودی سرکار کی جانب سے اس گانے پر پابندی عائد کرنے کے فیصلے کو آزادی اظہارِ رائے کے خلاف قرار دیتے ہوئے کئی سماجی حلقوں اور انسانی حقوق کی تنظیموں نے شدید تنقید کا نشانہ بنایا ہے۔

ناقدین کا کہنا ہے کہ پاکستان کے خلاف بڑھتی ہوئی سنسرشپ اب صرف غیر ملکی فنکاروں تک محدود نہیں رہی بلکہ بھارت کے اندر اپنے فنکار بھی اس کی زد میں آ رہے ہیں۔

واضح رہے کہ پہلگام واقعے کی حقیقت بے نقاب ہونے اور مودی حکومت کے فالس فلیگ آپریشن کا پردہ فاش کیے جانے کے بعد بھارتی سرکار شدید بوکھلاہٹ کا شکار ہو گئی ہے، ردعمل کے طور پر بھارت نے نہ صرف 16 پاکستانی یوٹیوب چینلز پر پابندی عائد کی بلکہ پاکستانی فنکاروں کے سوشل میڈیا اکاؤنٹس بھی بلاک کردیے اور اپنے ہی ملک کے گلوکاروں اور میڈیا شخصیات کے خلاف بھی پابندیوں اور قدغنوں کا سلسلہ شروع کر دیا ہے۔