بالی ووڈ کے معروف نغمہ نگار اور اسکرپٹ رائٹر جاوید اختر کی ایک حالیہ ویڈیو سوشل میڈیا پر وائرل ہو رہی ہے جس میں وہ صحافیوں کے پاکستان سے شکست کے سوالات پر برہمی کا اظہار کرتے نظر آتے ہیں۔

ویڈیو کے مطابق جاوید اختر ایک نجی تقریب سے واپس آ رہے تھے جب میڈیا نمائندوں نے انہیں گھیر کر حالیہ پاک بھارت کشیدگی پر ان کا مؤقف جاننے کی کوشش کی۔

ویڈیو میں دیکھا جا سکتا ہے کہ ابتدا میں جاوید اختر نے سوالات کے جواب دینے سے گریز کرتے ہوئے کہا کہ یہ وقت اور جگہ ایسی بات چیت کے لیے مناسب نہیں ہے۔

 تاہم صحافیوں کے اصرار پر انہوں نے غصے کا اظہار کرتے ہوئے ایک رپورٹر سے سخت لہجے میں کہا کہ کیا آپ چاہتے ہیں کہ میں آپ سے بدتمیزی کروں؟

اسی دوران انہوں نے ایک خاتون رپورٹر سے کہا کہ اگر وہ تفصیلی انٹرویو لینا چاہتی ہیں تو ان کے گھر آ کر وقت لے کر بات کر سکتی ہیں، جیسا کہ ماضی میں ہو چکا ہے۔

جاوید اختر کی یہ ویڈیو سوشل میڈیا پر تیزی سے وائرل ہو رہی ہے، بعض صارفین کا کہنا ہے کہ جاوید اختر اس موقع پر غیر ضروری طور پر برہم ہوئے جبکہ دیگر ان کا مؤقف درست قرار دیتے ہوئے کہتے ہیں کہ نجی لمحات کا احترام کیا جانا چاہیے۔

واضح رہے کہ حالیہ پاک بھارت کشیدگی کے بعد بھارتی میڈیا اور عوامی حلقوں میں اس معاملے پر مختلف آراء سامنے آ رہی ہیں اور معروف شخصیات سے بیانات لینے کی کوششیں بھی جاری ہیں۔