پاکستان کی سینئر اداکارہ فضیلہ قاضی نے شادی شدہ نوجوان جوڑوں کو کامیاب ازدواجی زندگی کے راز بتا دیئے ہیں۔

 حال ہی میں ایک مارننگ شو میں شرکت کے دوران اداکارہ فضیلہ قاضی نے شادی، تعلقات اور گھریلو زندگی سے متعلق کھل کر گفتگو کی۔

اداکارہ کا کہنا تھا کہ شادی ایک ایسا بندھن ہے جہاں دو مختلف پس منظر سے تعلق رکھنے والے افراد ایک ساتھ زندگی گزارتے ہیں، ایسے میں میاں بیوی کے درمیان ایک دوسرے کو “اسپیس دینا” اور سمجھنا بہت ضروری ہے۔

فضیلہ قاضی نے زور دیا کہ اگر کوئی جوڑا اپنی ازدواجی زندگی کو خوشگوار اور پرسکون بنانا چاہتا ہے تو اس رشتے میں لچک ہونی چاہیے، نہ کہ ضد کیونکہ ضد، رشتے میں دوریاں پیدا کرتی ہے جبکہ برداشت اور سمجھداری تعلق کو مضبوط بناتی ہے۔

دوسری جانب اداکارہ کے شوہر اور معروف فنکار قیصر خان زمانی نے بھی گفتگو میں حصہ لیتے ہوئے کہا کہ گھر کی بنیاد بھی ملک کی معیشت کی طرح معاشی استحکام پر ہوتی ہے۔

 انہوں نے مزید کہا کہ ایک مرد کو چاہیے کہ وہ خود کو مالی طور پر مضبوط کرے تاکہ گھریلو معاملات احسن انداز سے چل سکیں اور غیر ضروری پریشانیوں سے بچا جاسکے۔

یاد رہے کہ فضیلہ قاضی اور قیصر خان زمانی کا شمار شوبز انڈسٹری کے ان جوڑوں میں ہوتا ہے جنہوں نے نہ صرف فنی میدان میں کامیابی حاصل کی بلکہ ذاتی زندگی میں بھی ایک مثال قائم کی ہے۔