پاکستان شوبز انڈسٹری کے معروف اداکار فیروز خان نے اپنے دو ٹوک مؤقف میں کہا ہے کہ وہ ان فنکاروں کے ساتھ آئندہ کام کرنے کے خواہاں نہیں جنہوں نے اُن کے مشکل وقت میں ساتھ دینے سے انکار کیا تھا۔

یہ بات فیروز خان نے حال ہی میں اداکار و ہدایت کار یاسر نواز کے وی لاگ میں دیے گئے ایک انٹرویو کے دوران کہی، جس کا مختصر ویڈیو کلپ سوشل میڈیا پر تیزی سے وائرل ہو رہا ہے۔

یاسر نواز نے فیروز خان سے سوال کیا کہ کچھ فنکاروں نے آپ کے ساتھ کام کرنے سے انکار کیا کیا آپکو برا لگا؟ جس پر انہوں نے جواب دیا کہ اللہ تعالیٰ نے میری زندگی میں ایک فلٹر لگا دیا، جس نے مجھے دکھا دیا کہ کن لوگوں کے ساتھ تعلق رکھنا ہے اور کن سے خود کو دور رکھنا ہے۔

مزید پڑھیں: اقرا عزیز نے فیروز خان کیساتھ کام نہ کرنے کی وجہ بتادی

فیروز خان نے کہا کہ وہ افراد جو انہیں ذاتی طور پر جانتے تھے اور جن سے ان کی گہری دوستی تھی، ان کی طرف سے مشکل وقت میں اس طرح کا ردعمل آنا باعثِ حیرت ضرور تھا لیکن اب وہ اس کیفیت سے باہر آ چکے ہیں۔

اداکار نے مزید کہا کہ اب میں جان چکا ہوں کہ جو کچھ ہو رہا ہے، وہ میری زندگی کے سفر کا حصہ ہے، چاہے وہ مثبت ہو یا منفی لیکن مستقبل میں ایسے لوگوں کے ساتھ کام نہیں کرنا چاہتا جنہوں نے میرے ساتھ کھڑے ہونے سے گریز کیا۔

فیروز خان کا یہ بیان سوشل میڈیا پر مداحوں اور انڈسٹری کے حلقوں میں موضوعِ بحث بنا ہوا ہے، جہاں کئی صارفین ان کے مؤقف کو سراہ رہے ہیں جبکہ کچھ لوگ اسے انڈسٹری میں تقسیم پیدا کرنے کی علامت بھی قرار دے رہے ہیں۔