پاکستان کے مشہور یوٹیوبر اور ولاگر معاذ صفدر نے اپنے تازہ وی لاگ میں انکشاف کیا ہے کہ ان کے والد نے انہیں اور ان کے شادی شدہ بھائیوں کو علیحدہ گھر میں منتقل ہونے کا مشورہ دیا ہے جس پر عمل کرتے ہوئے وہ اب والدین کے ساتھ نہیں رہیں گے۔

ویڈیو میں معاذ صفدر نے دل گرفتگی کے ساتھ بتایا کہ ان کا خاندان تین حصوں میں تقسیم ہوچکا ہے۔

انہوں نے بتایا کہ ان کے والد کا فیصلہ ہے کہ چونکہ معاذ اور ان کے بڑے بھائی کی شادی ہوچکی ہے اور بچے بھی ہیں، اس لیے اب ان دونوں کو اپنے اپنے الگ گھر میں منتقل ہو جانا چاہیے۔

انہوں نے مزید بتایا کہ ان کا چھوٹا بھائی والدین، دونوں بہنوں اور اپنی اہلیہ کے ہمراہ اسی پرانے گھر میں رہے گا۔

معاذ صفدر نے اپنے مداحوں سے جذباتی انداز میں بات کرتے ہوئے کہا کہ یہ فیصلہ میرے لیے آسان نہیں کیونکہ اب تک کی زندگی انھی لوگوں کے ساتھ گزاری، ہر لمحہ آنکھوں کے سامنے گھوم رہا ہے۔

وی لاگ میں ان کے والد کا مؤقف بھی شامل تھا۔ انہوں نے اپنے فیصلے کی وضاحت کرتے ہوئے کہا کہ بیٹے! تم دونوں کی اب شادیاں ہوچکی ہیں، بچے بھی ہیں اور اکثر خاندانوں میں اصل اختلافات بچوں کے بعد ہی جنم لیتے ہیں۔

معاذ صفدر کے والد کا کہنا تھا کہ اب بہتر یہی ہے کہ وقت سے پہلے الگ ہو جاؤ تاکہ رشتوں میں محبت برقرار رہے اور دوری، تعلقات کو مزید مضبوط کرتی ہے۔

معاذ صفدر کے مداحوں نے اس فیصلے پر ملے جلے ردعمل کا اظہار کیا ہے، کچھ اسے ایک دانشمندانہ قدم قرار دے رہے ہیں جب کہ کئی صارفین نے یوٹیوبر کی جذباتی کیفیت پر ہمدردی کا اظہار کیا ہے۔