معروف پاکستانی گلوکارہ آئمہ بیگ نے اداکار شہباز شگری سے منگنی ٹوٹنے کی وجہ بتادی ہے۔
حال ہی میں اپنے دیے گئے ایک انٹرویو میں گلوکارہ آئمہ بیگ نے بتایا کہ میرے اور شہباز شگری کے درمیان پہلے سے ہی بہت سے مسائل چل رہے تھے جو لوگ نہیں جانتے ہیں اور میں بھی اس کی تفصیلات میں نہیں جانا چاہتی کیونکہ ان میں کچھ لوگ شامل تھے اور میں اب ان لوگوں کو بےنقاب نہیں کرنا چاہتی۔
انہوں نے کہا کہ شادی دو لوگوں کے درمیان نہیں بلکہ دو خاندانوں کے درمیان ہوتی ہے اور ہم دونوں کے خاندان بہت اچھے تھے، ان کے درمیان مسائل نہیں تھے۔
ان کا کہنا تھا کہ لیکن ہم دونوں کے درمیان بہت سی چیزیں چل رہی تھیں، اس لیے منگنی توڑنے کا ہمارا باہمی فیصلہ تھا لیکن یہ بنیادی طور پر میرا فیصلہ تھا۔
آئمہ بیگ نے بتایا کہ ہمارے درمیان چیزیں ٹھیک ہی نہیں ہورہی تھیں، اسی لیے میں نے رشتہ ختم کرنا بہتر سمجھا اور جب میں نے سوشل میڈیا پر اس کا اعلان کیا تو لوگوں نے مجھے غلط سمجھا، شہباز شگری کو کسی نے کچھ نہیں کہا اور صرف مجھے بُرا بھلا کہا۔
گلوکارہ کے مطابق میری فیملی نے میرے لیے ایک سپورٹ سسٹم کے طور پر کام کیا، میرے بھائی اور بہن مجھ سے سوشل میڈیا ٹرولنگ کو چھپاتے تھے لیکن مجھے معلوم تھا کہ کیا چل رہا ہے۔
انہوں نے کہا کہ لوگوں کی ٹرولنگ سے نہ صرف میری ساکھ اور ذہنی سکون کو نقصان پہنچا بلکہ میرے والدین، بہن، بھائی سب کو تنقید کا نشانہ بنایا گیا۔
ان کا مزید کہنا تھا کہ جب میری زندگی میں یہ سب کچھ ہو رہا تھا تو مجھے خودکشی کے خیالات آتے تھے۔
خیال رہے کہ ستمبر 2022 میں آئمہ بیگ نے اداکار شہباز شگری سے اپنی منگنی ٹوٹنے کا اعلان کیا تھا۔
