پنجاب میں ڈینگی کےجان لیوا حملے جاری، راولپنڈی میں مزید دوافراد ڈینگی وائرس کےباعث جاں بحق ہوگئے۔

تفصیلات کے مطابق ڈینگی کا شکارطلحہ اور گل محمد ہولی فیملی اسپتال میں زیر علاج تھے۔ دونوں متاثرین کا تعلق اسلام آباد سے ہے۔اسپتال انتظامیہ کی جانب سے لاش ورثا کے حوالےکردی گئی۔ راولپنڈی میں ڈینگی سے ہلاکتوں کی تعداد 32 ہوگئی۔

پنڈی بھٹیاں میں ڈینگی کا ایک اور مریض سامنے آگیا ۔ نواحی گاوں ٹھٹھہ ملیاں کے رہائشی مریض میں ڈینگی کی تصدیق ہوئی ہے جس کےبعدضلع میں ڈینگی سے متاثرہ مریضوں کی تعداد 20 ہوگئی۔

شہریوں کاکہناہے کہ ضلعی انتظامیہ اورمحکمہ ہیلتھ نے ڈینگی پر قابو پانے کے لیے اقدامات نہیں کیے۔ شہریوں کی جانب سے حکومت سے مطالبہ کیاگیا کہ علاقہ میں فوری اسپرے کروائےجائیں۔

سندھ میں ڈینگی سے 24 گھنٹوں کے دوران 235 افراد متاثرہوئے ہیں۔

محکمہ صحت سندھ کے مطابق اکتوبر کے مہینے میں سندھ میں دو ہزار930 افراد ڈینگی کا شکار ہوئے جس میں دو ہزار723 افراد کا تعلق کراچی سے ہے۔

 کراچی میں رواں سال 5ہزار766 افراد ڈینگی سے متاثر ہوئے۔ کراچی سمیت سندھ بھرمیں یہ تعداد 6ہزار147 ہوگئی۔

رواں سال ڈینگی سے نارتھ کراچی کی رہائشی 20 سالہ لڑکی جاں بحق ہوئی جس کو گزشتہ ہفتہ نجی اسپتال منتقل کیا گیا تھا۔

کوئٹہ میں بھی ڈینگی وائرس کاایک اورمریض شکارہوگیا۔ ڈینگی کامریض ژوب سے کوئٹہ لایاگیا۔ جس کے بعدشہرمیں ڈینگی کےشکار اسپتال میں زیرعلاج مریضوں کی تعداد چارہوگئی۔