پنجاب میں ڈاکٹروں کا سرکاری اسپتالوں کی ممکنہ نجکاری کے خلاف احتجاج جاری ہے۔ اسپتالوں میں اوپی ڈیز،آپریشن تھیڑزاورلیبارٹریز مکمل طورپربند ہیں۔

 لاہور سمیت پنجاب بھر کے سرکاری ٹیچنگ ہسپتالوں کی نجکاری کے سلسلے میں پنجاب کی صوبائی کابینہ سے منظور کروائے جانے والے ایم ٹی آئی ایکٹ کے خلاف لاہور کے سات بڑے ٹیچنگ ہسپتالوں میں الائیڈ ہیلتھ الائنس کی احتجاجی ہڑتال دسویں روز بھی جاری ہے۔ جس کے نتیجے میں سرکاری ہسپتالوں کی او پی ڈی اور لیبارٹریاں بند رہیں سینئر ڈاکٹرز کو آپریشن ملتوی کرنا پڑے جبکہ مریضوں کو شدید پریشانی کا سامنا کرنا پڑا، احتجاجی ینگ ڈاکٹرز، نرسز اور پیرا میڈیکس احتجاجکرتے ہوئے سڑکوں پر نکل آئے، جس سے ٹریفک بند ہو کر رہ گئی ۔

فیصل آبادمیں بھی مظاہرین نے ڈی ایچ کیو اور الائیڈ اسپتال کی او پی ڈیز،آپریشن تھیٹراور ریڈیالوجی ڈیاپرٹمنٹس بندکر دیئے۔ مظاہرین کا کہنا ہےکہ ایم ٹی آئی ایکٹ کے خاتمے تک ہڑتال جاری رہے گی۔

ادھرملتان کے نشتر اسپتال میں بھی کے ڈاکٹروں کی ہڑتال جاری ہے۔ مسلسل ہڑتال کے باعث او پی ڈی آنے والے مریضوں کو دشواری کا سامنا ہے۔

جبکہ دوسری طرف محکمہ صحت پنجاب نے الائیڈ ہیلتھ الائنس کے احتجاج اور ہڑتال کا نوٹس لیتے ہوئے قانونی کارروائی کا آغاز کر دیا ہے، جس کے تحت محکمہ صحت پنجاب نے جناح ہسپتال کے ایک میڈیکل افسر ڈاکٹر شاہد علی کو جواب طلبی نوٹس جاری کر دیا ہے۔