جنوبی کوریا میں اومیکرون ویریئنٹ کےپہلے پانچ کیسز کا تعلق نائیجیریا سے آنے والوں سے ہونے کی تصدیق ہوگئی۔ اس پیشرفت کے پیشِ نظرجنوبی کوریا کی  حکومت پر ملکی سرحدوں کو بند کرنے کےلیے دباؤ ہے۔

بدھ کے روز کوریا ڈیزیز کنٹرول اینڈ پریونشن کا کہنا تھا کہ سامنے آنے والے کیسز میں ایک جوڑا ،جو 24 نومبر کو نائیجیریا سے آیا اور ان کا ایک دوست شامل ہے جو ان کو ایئرپورٹ سے گھر لے گر گیا۔ دو دیگر کیسز خواتین کے ہیں جو 23 نومبر کو نائیجیریا سے جنوبی کوریا پہنچیں۔

ہیلتھ ورکرز نےاس سے قبل کہا تھا کہ وہ جوڑے کے بچے اور جوڑے کو ایئرپورٹ سے گھرلے جانے والے شخص کے رشتے داروں کے جینیٹک سیکوئنسنگ ٹیست لے رہے ہیں تاکہ معلوم ہوسکے کہ وہ متاثر ہیں یا نہیں۔

اومیکرون انفیکشنز کی تصدیق کے بعد جنوبی کوریا نے اعلان کیا کہ اگلے دو ہفتوں تک بیرونِ ملک سے آنے والے تمام مسافروں کو کم از کم 10 دنوں کا کوارینٹائن کرنا ہوگا۔ اور اس چیز میں ان کی شہریت یا ویکسینیشن اسٹیٹس کی پرواہ نہیں کی جائے گی۔

جنوبی کوریا اومیکرون وائرس سے بچنے کےلیے پہلے ہی آٹھ جنوبی افریقی  ممالک سے آنے والے قلیل مدتی غیر ملکی مسافروں کی آمد پر پابندی عائد کرچکا ہے۔

جنوبی کوریا کے حکام کا کہنا ہے کہ بالکل انہی قوانین کا اطلاق نائیجیریا سے آنے والے غیرملکیوں پر بھی ہوگا۔