پاکستان کی ہیلتھ اتھارٹیز نے پیر کو کووڈ کے مریضوں کے لیے چین کی روایتی جڑی بوٹی کی ادویات کے کامیاب کلینکل ٹرائل کا اعلان کیا ہے۔

غیر ملکی خبر رساں ادارے کے مطابق جِنہوا شِنگن گرانولز نامی چینی دوا پہلے ہی چین میں کووڈ کے مریضوں کے علاج کے لیے استعمال کی جارہی ہے۔

انٹرنیشنل سینٹر فار کیمیکل اینڈ بائیولوجیکل سائنس کے ڈائریکٹر پروفیسر اقبال چوہدری نے رپورٹروں کو بتایا کہ چوں کہ اس کو کووڈ-19 کے مختلف ویریئنٹس کے مریضوں پر آزمایا گیا تھا، ہمیں توقع تھی کہ یہ دیگر ویریئنٹس کی طرح اومیکرون کے لیے بھی مؤثر ہوگی۔

پرنسپل انوسٹیگیٹر ڈاکٹر رضا شاہ نے رپورٹرز کو بتایا کہ یہ ٹرائلز 300 مریضوں پر کیے گئے جن کا علاج گھروں پر کیا گیا اور یہ دوا درمیانی شدت کے کووڈ کیسز پر کام کرے گی۔

انہوں نے مزید کہا کہ اس کی تاثیر کی شرح 82.67 فی صد تھی۔

ٹرائلز کی تصدیق ڈرگ ریگولیٹری اتھارٹی پاکستانی (DRAP) کی جانب سے کی گئی۔

پیر کے روز پاکستان میں 4340 کووڈ-19 کے کیسز ریکارڈ کیے گئے، جو تین مہینوں میں کسی بھی دن ریکارڈ ہونے والے سب سے زیادہ کیسز ہیں۔

ملک کا سب سے بڑے شہر کراچی میں ہفتے کے آخر میں مثبت کیسز کی شرح 39.39 فی صد ریکارڈ کی گئی، جو اب تک کی سب سے زیادہ شرح ہے۔

نیشنل کمانڈ اینڈ کنٹرول سینٹر نے پیر کے روز ایک ٹوئٹ میں کہا کہ گزشتہ سات دنوں میں پاکستان میں کووڈ کیسز کی شرح میں 170 فی صد اضافہ ہوا ہے جبکہ اموات کی شرح میں 62 فی صد اضافہ ہوا ہے۔