املوک جسے جاپانی پھل کے نام سے جانا جاتا ہے، یہ اپنی مٹھاس اور شہد جیسے ذائقے کی وجہ سے شہرت رکھتا ہے لیکن آپ اس کے جادوئی فوائد نہیں جانتے ہوں گے۔

  کیلوریز اور منرلز، کیلشیم، فاسفورس اور وٹامن (اے )اور (سی) سے بھرپور یہ پھل اپنے اندر بے شمار جادوئی فوائد سمیٹے بیٹھا ہے۔

اسے جاپانی پھل اس لیے کہا جاتا ہے کیونکہ جاپان میں اگائی جانے والی اس کی ایک قسم ڈیوسپائروس کاکی کی بہت زیادہ مقبولیت ہے۔

چین سے تعلق رکھنے والا یہ پھل جس کی کاشت ہزاروں سال سے ہورہی ہے اور اب دنیا بھر میں اس کی مختلف اقسام کو اگایا جاتا ہے۔

آنکھوں کے لئے وٹامن سی بہت ضروری ہوتا ہے اس لیے یہ کھانے سے آنکھوں کی بینائی میں اضافہ ہوتا ہے اور یہ پھل آنکھوں کے مختلف امراض سے بھی تحفظ فراہم کرتا ہے۔

اس کے علاوہ جاپانی پھل میں موجود وٹامن سی کی وافر مقدار قوت مدافعت کو مضبوط بناتی ہے اور اس کی مضبوطی آپ کو مختلف امراض سے لڑنے میں اور جلد صحت یاب ہونے میں مدد دیتی ہے۔

اس پھل میں موجود فائبر اور پانی کی وافر مقدار قبض کے لئے نہایت مفید ہے، ماہرین کے مطابق اسکا روزانہ استعمال قبض اور کینسر کے خطرات کو کم کردیتا ہے جبکہ آنتوں کے زخم، السر اور چھوٹی آنت کے السر میں بھی یہ پھل نہایت مفید ہے، معدے میں تیزابیت اور پیٹ کے مختلف امراض میں دوا کے ساتھ ساتھ اس پھل کا استعمال مرض کو جلد رفع کرتا ہے ۔

جاپانی پھل میں موجود کیلشیم اور فاسفورس ہڈیوں کو مضبوط بناتے ہیں۔

ماہرین کے مطابق روزانہ ورزش کے ساتھ اس پھل کا استعمال کیا جائے تو آسٹیوپوروسس اور ہڈیوں کی دیگر بیماریوں سے محفوظ رہا جا سکتا ہے ۔