گردوں کے مریضوں کو اب پریشان ہونے کی ضرورت نہیں ہے کیونکہ گردوں کے امراض سے بچنے کے حیرت انگیز اور آسان طریقے سامنے آگئے ہیں۔

گردے جسم کے اندر کچرے، اضافی پانی اور خون میں موجود دیگر مواد کو فلٹر کرتے ہیں جو پیشاب کے راستے جسم سے خارج ہوتا ہے۔

گردے جسم کے لیے بہت اہم ہوتے ہیں اور یہی وجہ ہے کہ ان کی صحت کا خیال رکھنا بھی ضروری ہے۔

آج ہم آپ کو ایسی چیزوں کے بارے میں بتائیں گے جن سے آپ گردوں کو آسانی سے صحت مند رکھ سکتے ہیں۔

پانی پینا مت بھولیں

یہ وہ عام ترین غلطی ہے جو گردوں کے امراض کا باعث بنتی ہے یعنی پانی کم پینا، مناسب مقدار میں پانی پینے سے گردوں کو صحت مند رکھنے میں مدد ملتی ہے۔

جسمانی سرگرمیاں

ورزش کرنے یا جسمانی سرگرمیوں کو معمول بنانے سے صرف جسمانی وزن میں ہی کمی نہیں آتی بلکہ گردوں کے دائمی امراض کا خطرہ بھی کم ہوتا ہے۔

بلڈ شوگر اور بلڈ پریشر پر نظر رکھیں

یہ بھی پڑھیں: گردے میں پتھری کی صورت میں کون سی علامات سامنے آتی ہیں؟

بلڈ شوگر اور بلڈ پریشر دونوں کی سطح بڑھنے سے گردوں کو نقصان پہنچتا ہے اور یہی وجہ ہے کہ ان کو کنٹرول میں رکھنے سے گردوں کے امراض کا خطرہ کم کرنا ممکن ہے۔

جسمانی وزن کو کنٹرول کریں

زیادہ جسمانی وزن یا موٹاپے سے متعدد ایسے امراض کا خطرہ بڑھتا ہے جو گردوں کو نقصان پہنچاتے ہیں، ان امراض میں ذیابیطس، ہائی بلڈ پریشر اور امراض قلب قابل ذکر ہیں۔

تو اگر آپ ان تمام بیماریوں سے بچنا چاہتے ہیں تو اپنے جسمانی وزن پر کنٹرول کریں۔

اچھی غذا کا استعمال عادت بنائیں

زیادہ نمک، پراسیس گوشت اور بہت زیادہ چینی کا استعمال گردوں کو نقصان پہنچاتا ہے تو ان کا استعمال کم کرکے جبکہ پھلوں، سبزیوں، دالوں، مچھلی، اناج اور گریوں پر مشتمل غذا کو ترجیح دیں۔

تمباکو نوشی سے گریز

تمباکو نوشی سے خون کی شریانوں کو نقصان پہنچتا ہے جس کے باعث جسم اور گردوں کے لیے خون کا بہاؤ متاثر ہوتا ہے، تمباکو نوشی سے گردوں کے کینسر کا خطرہ بھی بڑھتا ہے۔

عام درد کش ادویات کا زیادہ استعمال نہ کریں

اگر آپ اکثر عام درد کش ادویات کا استعمال کرتے ہیں تو اس عادت سے بھی گردوں کو نقصان پہنچ سکتا ہے، ایسی ادویات کو روزانہ کی بنیاد پر لینے سے گریز کریں۔