ایک تحقیق کے مطابق پروٹین اور فائبر سے بھرپور غذائیں پرسکون نیند اور اس کے دوارنیے کو بہتر بنانے میں اہم کردار ادا کرتی ہیں۔

یہ بات سب ہی جانتے ہیں نیند اور غذا کا آپس میں گہرا تعلق ہے، تاہم اس نئی تحقیق میں اس حوالے سے مزید دلچسپ تفصیلات سامنے آئیں ہیں۔

جاپان کی یونیورسٹی آف سوکوبا کے محققین نے 4,825 افراد کے ڈیٹا کا مطالعہ کیا ہے جو نیند اور غذا کی نگرانی کے لیے موبائل ایپس کا استعمال کر رہے تھے۔

اس تحقیق کے نتائج کے مطابق چکنائی اور سوڈیم کی زائد مقدار  نیند کے کم دورانیےجبکہ زیادہ پروٹین اور فائبر کی مقدار زیادہ نیند کے وقت سے منسلک تھی۔

محققین کا کہنا ہے  کہ جن لوگوں کی خوراک میں فائبر کا زیادہ تناسب ہوتا ہے وہ نہ صرف جلدی سو جاتے ہیں بلکہ دوران نیند  کم بیدار ہوتے ہیں۔ فائبر اور نیند کے معیار کے درمیان اسی طرح کا تعلق ماضی کی تحقیق میں بھی سامنے آچکا ہے۔

تاہم اس نئی تحقیق میں فرق بہت زیادہ نہیں تھا، تحقیق میں شامل ایسے شرکاء جنہوں نے پروٹین کی زائد مقدار کو غذا میں شامل رکھا وہ ہر رات ایک چوتھائی گھنٹے سے کچھ زیادہ نیند لے رہے تھے۔

محققین کا کہنا ہے کہ زیادہ پروٹین کھانے سے دماغ میں میلاٹونن اور سیروٹونن سمیت کیمیائی میسنجرز کی پیداوار میں اضافہ ہوتا ہے جو نیند کو منظم کرنے میں مدد دیتے ہیں، اسی طرح فائبر کی مقدار سے آنتوں کے بیکٹیریا پر مثبت اثرات پڑتے ہیں جو کہ ایک صحت مند آنت صحت مند نیند سے منسلک ہو سکتی ہے۔