نوجوانوں میں فالج کے حملوں میں تشویشناک حد تک اضافہ ،عالمی  ماہرین صحت نے وجوہات سے آگاہ کردیا۔

اس سلسلے میں عالمی ادارۂ صحت نے خبردار کیا ہے کہ فالج ایک سنگین قلبی عارضہ ہے اور دنیا بھر میں اموات کی تیسری بڑی وجہ ہے۔

ماہرین کے مطابق نوجوانوں میں فالج کے بڑھتے ہوئے رحجان کے تباہ کن نتائج ہو سکتے ہیں، جن میں جسم یا مختلف اعضاء کا مفلوج ہو جانا اور ذہنی کمزوری شامل ہیں۔

معالجین کے مطابق اگرچہ تاریخی طور پر یہ مرض زیادہ عمر کے بالغ افراد کو متاثر کرتا رہا ہے، مگر تازہ ترین تحقیق کے مطابق نوجوانوں میں اس کے کیسز تیزی سے بڑھ رہے ہیں۔

ماہرین کے مطابق یہ رجحان تشویشناک ہے اور اس کی وجوہات سمجھنا ضروری ہے۔

فالج اور اس کی وجوہات  

فالج اس وقت ہوتا ہے جب دماغ کو خون کی سپلائی منقطع ہو جاتی ہے۔جس سے دماغی خلیات آکسیجن اور غذائی اجزاء سے محروم ہو جاتے ہیں۔

اس طرح کی صورتحال میں خلیات کی موت اور معذوری ہو سکتی ہے۔2021ء میں فالج دل کی اسکیمک بیماری اور کووڈ 19 کے ساتھ عالمی سطح پر اموات کی بڑی وجوہات میں شامل تھا۔

دنیا بھر میں تقریباً 10 میں سے 1 شخص فالج سے مرتا ہے۔امریکی سینٹرز فار ڈیزیز کنٹرول اینڈ پریوینشن کی جانب سے جاری کردہ حالیہ رپورٹ میں اس حوالے سے تشویشناک رجحان پایا گیا ہے۔

2013ء سے 2019ء کے درمیان 45 سے 64 سال کی عمر کے امریکیوں میں فالج سے ہونے والی اموات میں 19 فیصد اضافہ ہوا۔