خبررساں ادارے کے مطابق بھارت کے شہر گڑگاؤں کی رہائشی ایئر ہوسٹس نے اپنے مکان مالک کی جانب سے جنسی ہراساں کیے جانے پرخودکشی کرلی۔

غیرملکی خبررساں ادارے کی رپورٹ کے مطابق مستھو سرکار نامی لڑکی ایک پرائیویٹ ایئرلائن میں ایئرہوسٹس کی ڈیوٹی کرتی تھی،لڑکی کے والد نے مالک مکان پر جنسی ہراساں کرنے کا الزام لگایا ہے۔

لڑکی کے والد نے بتایا کہ اس کی بیٹی نے رات 2 بجے فون کر کے بتایا کہ مالک مکان نے اسے ہراساں کیا ہے، مالک مکان نے گزشتہ روز بھی اس کے ساتھ نازیبا حرکات کیں تھیں۔
والد نے اس بات کا بھی انکشاف کیا کہ مالک مکان نے اس کی بیٹی کا موبائل فون ہیک کرلیا تھا اور کہیں آنے جانے کی اجازت نہیں دے رہا تھا۔

لڑکی کے والد نے ایف آئی آر میں یہ موقف اختیار کیا ہے کہ وہ واپس سلیگوری جانا چاہتی تھی کیونکہ وہ اب ذلت آمیز رویہ برداشت نہیں کرسکتی تھی۔

پولیس آفیسر کا کہنا ہے کہ لڑکی نے پنکھے سے لٹک کر اپنی جان لی ہے، فرانزک ٹیم نے بھی جائے وقوعہ کا دورہ کیا ہے اور شواہد اکٹھے کرلیے ہیں۔

پولیس کا مزید کہنا ہے ک لڑکی کے والد کی جانب سے درج کرائی گئی شکایت پر ہم نے سیکشن 306 کے تحت ایف آئی آر درج کر لی ہے اور ملزم کی گرفتاری کے لیے چھاپے مارے جارہے ہیں۔