کورونا وائرس کی تشخیص کے لیے جاپان کی جانب سے1000 سیمپلز کی کٹس پاکستان کو بھجوا دی گئیں۔

تفصیلات کے مطابق قومی ادارہ برائے صحت اسلام آباد کے لیب ڈویژن کے انچارج ڈاکٹرمحمد سلیمان کا کہناہے کہ جاپانی حکومت کی جانب سے کورونا وائرس کی تشخیص کے لیے کٹس بھجوادی گئی ہیں جو کہ جمعے کی صبح انہیں موصول ہو جائیں گی، جس کے بعد وہ کم از کم ایک ہزار مشتبہ سیمپلز کی تشخیص کے قابل ہوجائیں گے۔

انہوں نےبتایا کہ جاپان کےعلاوہ امریکا کے ادارے سینٹرفارڈیزیز کنٹرول کی جانب سے بھی کیمیکلز پاکستان کوفراہم کیے جارہے ہیں جو کہ چند دنوں میں پاکستان پہنچ جائیں گے۔

ڈاکٹرمحمد سلیمان نے مزید بتایا کہ حکومت پاکستان نے جرمنی، چین اور ہانگ کانگ جنگ سے ان پرائیمز یا کیمیکلز کی خریداری کے لیے بھی رابطہ کیا ہے تاکہ مقامی طور پر کرونا وائرس کی تشخیص کی جاسکے۔

انہوں نے بتایا کہ اس وقت قومی ادارہ برائے صحت تقریبا تمام وائرسز کی تشخیص کی صلاحیت رکھتا ہے لیکن چونکہ کورونا وائرس نیا کیس ہے اس لیے اس کی تشخیص میں استعمال ہونے والے پرائمرز یا کیمیکلز پاکستان میں تیار نہیں ہورہے۔

ان کا کہنا تھا کہ جمعہ کے روز قومی ادارہ برائے صحت کو پرائمرز ملنے کے بعد پورے ملک سے مشتبہ سمپلز ان کے پاس پہنچنا شروع ہو جائیں گے۔

وفاقی وزارت صحت کے حکام نے بھی بتایا ہے کہ کئی دوست ممالک جن میں چین جاپان امریکہ اور جرمنی شامل ہیں پاکستان کو کورونا وائرس کے خطرے سے نمٹنے کے لیے آلات اور رہنمائی فراہم کرنے کے لیے تیار ہیں۔

اس سلسلے میں عالمی ادارہ صحت کے حکام بھی ضروری ادویات اور آلات حاصل کر رہے ہیں جنہیں کسی بھی ناگہانی صورت حال میں حکومت پاکستان کے حوالے کیا جائے گا۔