مسلم لیگ ن کے مرکزی رہنما خواجہ آصف نے میاں محمد نوازشریف کے خط کے بارے میں لاعلمی کا اظہار کر دیا  ہے۔

تفصیلات کے مطابق پارلیمنٹ کی مشاورتی قانونی کمیٹی کا آرمی ایکٹ میں ترمیم کے بل کے حوالے سے منعقدہ اجلاس ختم ہوا تواجلاس کےبعد میڈیا سے گفتگو کرتے ہوئے مسلم لیگ ن کے سینئرمرکزی رہنما خواجہ آصف نے کہا کہ نوازشریف کے خط کا مجھے علم نہیں ہے۔

بل کے متعلق گفتگو کرتے ہوئےن لیگی رہنما  نےبتایا کہ طے پایا ہے کہ بل دفاعی قائمہ کمیٹی میں جائے گا، اسی لیے دفاعی کمیٹی کا اجلاس بھی آج ہی طلب کرلیا گیا ہے۔

اہم بل گھنٹوں میں منظور نہیں کیے جاتے

خواجہ آصف کا مزید کہنا ہے کہ دفاعی کمیٹی آج ہی بل منظور کر لے گی، قائمہ کمیٹی دفاع سے منظوری کے بعد بل کل قومی اسمبلی میں منظوری کے لیے پیش ہوگا۔

مسلم لیگی رہنما نے یہ بھی کہا کہ قومی اسمبلی سے منظوری کے بعد کل سینیٹ میں بل پیش کیا جائے گا، قومی اسمبلی اور سینیٹ کے اجلاس کل بھی ہوں گے۔

واضح رہے کہ سابق وزیر اعظم میاں محمد نواز شریف کی جانب سے خواجہ آصف کو خط لکھ کر تحریری ہدایت دینے کے حوالے سے خبر سامنے آئی تھی۔

خبر کے مطابق نواز شریف نے کہا کہ اہم بل 24 یا 48 گھنٹوں میں منظور نہیں کیے جاتے، آرمی ایکٹ ترمیمی بل کی منظوری کے لیے کم سے کم یہ ٹائم فریم اپنایا جائے، بل آج قومی اسمبلی میں پیش کیا جائے اور اسٹینڈنگ کمیٹی کو ریفر کردیا جائے۔

نواز شریف کا کہنا ہے کہ جلدبازی نہ کریں، پروسیجرز بلڈوز نہ کریں، اتنا اہم بل منظور کرنے کے لیے پارلیمنٹ کو ربر اسٹیمپ جیسا نظر نہیں آنا چاہیے، حکومت پر زور دیا جائے کہ پارلیمانی اقدار اپنائی جائیں اور بل پر مثبت انداز سے دیکھا جائے گا مگر پارلیمنٹ کی توقیر پر سمجھوتا نہیں کیا جاسکتا۔

سابق وزیراعظم نے کہا کہ 7 اور 8 جنوری کو اسٹینڈنگ کمیٹی بل پر غور کرے اور رپورٹ قومی اسمبلی کو پیش کرے، اسٹینڈنگ کمیٹی کے اراکین کے لیے سفارشات مرتب کی جائیں۔

نواز شریف نے خواجہ آصف سے کہا ہے کہ 13 جنوری کو سینیٹ بل کو اپنی اسٹینڈنگ کمیٹی میں بھیجے تاکہ وہ اس پر غور کرے، 15 جنوری کو سینیٹ اس بل پر غور اور بحث کرے اور ووٹنگ کرے۔ اس کے بعد بل کو سینیٹ میں بھیج دیا جائے۔

نواز شریف نے خط میں مزید کہا کہ تمام سیاسی جماعتیں اپنی پارلیمانی پارٹیوں کا سیشن بلائیں اور بل پر غور کریں، پارلیمانی اقدار کا مناسب خیال نہ رکھا گیا تو اثرات تمام سیاسی جماعتوں پر پڑیں گے۔

سابق وزیر اعظم نے خواجہ آصف کو یہ بھی ہدایت دی کہ اس سے پہلے کہ حکومت بل قومی اسمبلی میں پیش کرے، نون لیگ اپنی پارلیمانی پارٹی کی میٹنگ بلائے اور تمام اراکینِ قومی اسمبلی و سینیٹ کو ان ہدایات سے آگاہ کیا جائے۔