مسلم لیگ ن کی رہنما مریم اورنگزیب نے کہا ہے کہ وزیرصحت پنجاب یاسمین راشد کونواز شریف کی ناساز طبعیت کا یقین نہیں آرہا توخود لندن جاکر دیکھ آئیں۔

مریم اورنگزیب کاکہناتھا کہ عمران  خان کے دباؤ پر کی گئی پریس کانفرنس قابل افسوس ہے، وزیر صحت کی سربراہی میں بورڈ نے نواز شریف کا بیرون ملک علاج تجویز کیا تھا۔

رہنما ن لیگ کامزید کہناتھا کہ عمران  خان کی حکومت پراب ترس آنے لگا ہے، نوازشریف کا آج بھی ریبیوڈیم پی ای ٹی اسکین ہوا، نواز شریف کی رپورٹ موجود ہونے کے باوجود سیاسی تماشا لگا دیا گیا۔

دوسری جانب سابق وزیراعظم نوازشریف کے ذاتی معالج ڈاکٹرعدنان نے دعویٰ کرتے ہوئے کہا ہے کہ سابق وزیراعظم کی طبی رپورٹ سماجی رابطے کی ویب سائٹ ٹویٹر پر شئیر کردی ہے جس میں انکی طبعیت سے متعلق تمام تر تفصیلات موجود ہیں۔

انہوں نے کہا کہ نواز شریف کی رپورٹ ڈاکٹر لارنس نے تیار کی ہے، رپورٹ میں اس بات کا قوی اندیشہ ظاہر کیاگیا ہے کہ اگر نواز شریف کی بروقت اینجوگرافی نہ کروائی گئی تو ان کو شدید خطرہ لاحق ہوسکتا ہے۔

واضح رہے کہ نواز شریف کی لندن میں بیٹوں، بھتیجوں اور بھائی شہباز شریف کے ہمراہ ایک تصویر منظر عام پرآئی ہے جس میں وہ ایک ریستوران میں بیٹھ کر کھانا کھا رہے ہیں۔

نواز شریف کی تصویر سوشل میڈیا پر وائرل ہونے کے بعد انکوسیاسی مخالفین کی جانب سے شدید تنقید کا نشانہ بنایا جارہا ہے۔