24 فروری سے حج بیت اللہ کی درخواستوں کی منظوری شروع کر دی جائے گی۔
تفصیلات کے مطابق وزارت حج ومذہبی امورنے عازمین حج سے درخواستوں کی وصولی کی منظوری دے دی ہے، 24 فروری سے نامزد بینک حج درخواستیں وصول کرسکیں گے۔
وزارت حج کی طرف سے عازمین کوہدایت کی گئی ہے کہ وہ گروپ کی شکل میں درخواست جمع کروائیں۔
خیال رہے ایک گروپ میں زیادہ سے زیادہ 14 افراد کو شامل کیا جاسکتا ہے کیونکہ قرعہ اندازی میں گروپ کا نام شامل ہوگا، کامیابی اور ناکامی کا اطلاق گروپ میں شامل تمام ممبران پر ہوگا۔
دوسری جانب وزارت حج نے 70 سال سے زائد عمر کے عازمین کے لیے 10 ہزار کا کوٹہ مختص کیا ہے۔
اس کے علاوہ سمندر پار پاکستانیوں کے لئے ایک ہزار کا کوٹہ رکھا گیا ہے۔
یاد رہے کہ5 ماہ سے زیادہ کی حاملہ خواتین بھی حج کے لئے درخواست دینے کی اہل نہیں ہیں، اسی طرح ایسے افراد جو شدید عارضہ قلب، تپ دق، دمہ ، ہائی لیول کی شوگر اور بلڈ پریشرکے مریض بھی درخواست نہیں دے سکیں گے۔
سکھر اورکوئٹہ کے درخواست دہندگان کو حج کے اخراجات 4 لاکھ 55 ہزار695 روپے جمع کروانا ہوں گے جبکہ قربانی کی رقم کے ساتھ کل اخراجات 4 لاکھ 78 ہزار 520 روپے ہوں گے۔
جو عازمین اسلام آباد، پشاور، لاہور، ملتان اور فیصل آباد جائیں گے انہیں 4 لاکھ 63 ہزار445 روپے جبکہ قربانی کی رقم کے ساتھ کل رقم 4 لاکھ 86 ہزار 270 روپے جمع کروانی ہوگی۔
وزارت حج کے مطابق ان اخراجات میں حجاج کی ٹریننگ، دوطرفہ ہوائی جہاز کا ٹکٹ، مکہ اور مدینہ میں رہائش، کھانا، ٹرانسپورٹ، بورڈنگ اور تکافل فیس شامل ہے۔
اس حوالے سے وفاقی وزیربرائے مذہبی امورپیرنوالحق قادری کا کہنا کہ سعودی عرب کے روڈ ٹو مکہ منصوبے کے تحت اس برس پاکستانی عازمین کی امیگریشن پاکستان میں ہی ہوگی۔ گزشتہ برس یہ سہولت صرف اسلام آباد سے سفر کرنے والے عازمین کے لیے تھی تاہم اس بار کوشش ہوگی کہ یہ سہولت لاہور، کراچی سمیت دیگر شہروں سے سفر کرنے والے مسافروں کو بھی فراہم کی جائے۔
واضح رہے کہ رواں برس حکومت نے ایک طرف حج اخراجات میں اضافہ کیا تو دوسری طرف حج کوٹہ بھی کم کردیا ہے، گزشتہ برس ایک لاکھ 84 ہزار 210 لوگ حج کے لئے گئے جب کہ اب ایک لاکھ 79 ہزار 210 عازمین فریضہ حج کی ادائیگی کے لئے جائیں گے،۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News