پاکستان نے بھارت کے نام نہاد جموں وکشمیر ری اورگنائزیشن آرڈر 2020 کو سختی سے مسترد کردیا ۔

ترجمان دفتر خارجہ عائشہ فاروقی نے بیان جاری کرتے ہوئےکہا ہے کہ پاکستان بھارت کی طرف سے جموں و کشمیر میں آبادیاتی تناسب میں تبدیلی کے غیر قانونی کوششوں کی مذمت کرتا ہے ۔

ترجمان دفتر خارجہ کاکہناتھا کہ بھارت کی طرف سے حالیہ جموں و کشمیر ری آرگنائزیشن آرڈر 2020 کی مذمت کرتے ہیں،یہ نام نہاد آرڈر غیر کشمیریوں کو جموں و کشمیر میں بسانے کی کوشش ہے ۔

 ترجمان نے کہا کہ بھارتی اقدام عالمی قوانین اور چوتھے جنیوا کنونشن کی صریحاً خلاف ورزی ہے ،بھارتی اقدام 5 اگست کے غیر قانونی اقدام کا تسلسل ہے،کشمیریوں نے اس تازہ قانون کو ناقابلِ قبول قرار دے کر مسترد کر دیا ہے ۔

 دفتر خارجہ کی ترجمان نے کہا کہ کشمیری اپنے بنیادی حقوق اور آبادیاتی تناسب میں تبدیلی کی کبھی اجازت نہیں دیں گے،عالمی وبائی صورتحال کے موقع پر بھارت کا یہ قدم اس بات کی غمازی کرتا ہے کہ بھارت اس موقع سے فائدہ اٹھانا چاہتا ہے ۔

 ترجمان نے کہا کہ ایسے وقت میں جب تمام دنیا کی توجہ کورونا پر مرکوز ہے بی جے پی ہندتوا کے منحوس ایجنڈے پر کام کر رہا ہے،اقوام متحدہ اور عالمی برادری بھارت کے اس اقدام کا فوری نوٹس لےاورعالمی برادری بھارت کو کشمیر میں ڈیموگرافک تبدیلی سے روکے۔

 دفتر خارجہ کی ترجمان نے مزید کہا کہ پاکستان بھارت کی ریاستی دہشتگردی کو دنیا کے سامنے لاتا رہے گا،بھارت جو مرضی حربے آزما لے کشمیریوں کو توڑ نہیں سکے گا ۔