ترک صدررجب طیب اردوان نے بحیرہ اسود میں ترک ساحل کے قریب قدرتی گیس کے ذخائر دریافت کرنے کا اعلان کیاہے ۔

ترک خبر ایجنسی کی رپورٹ کے مطابق طیب اردوان نے استنبول کے تاریخی دولماباغچہ محل میں اپنے خطاب میں کہا کہ ‘ترکی کو بحیرہ اسود میں قدرتی گیس کے بڑے ذخائر ملے ہیں’۔

طیب اردوان نے کہا کہ گیس کی تلاش کرنے والے جہاز فاتح نے 11.3 کھرب کیوبک فٹ قدرتی گیس دریافت کرلی ہے۔

ترک صدرکاکہنا تھا کہ بحیرہ اسود کے قریبی صوبے میں گیس دریافت ہونے والے علاقے میں ٹیونا ون ذخیرے کی ٹیسٹنگ، جائزہ اور انجنیئرنگ تحقیق کے تمام مراحل مکمل کرلیے گئے ہیں اور اب اس منصوبے کو ’’سکاریا گیس فیلڈ‘‘ کا نیا نام دیا گیا ہے۔

ترک صدر نے گیس اور تیل کے مزید ذخائر کی تلاش جاری رکھنے کا اعلان کرتے ہوئے کہا کہ فاتح اور یوریز ڈرلنگ جہازوں نے بحیرہ اسود اور بحیرہ روم میں گہرے پانی میں 9 مقامات پر ڈرلنگ کی ہے۔

ترک  صدرنےاس تمام منصوبے پرکام کرنے والے تمام عہدیداروں اورمزدوروں کومبارکباد دیتے ہوئےوزیر خزانہ بیرات البائرک، وزیر توانائی و قدرتی وسائل فاتح دونمیز اوران کی ٹیموں کا بھی شکریہ ادا کیا۔

رپورٹ کے مطابق ڈرلنگ جہاز فاتح نے گیس کی تلاش کا کام رواں برس 20 جولائی کو شروع کیا تھا۔

 خیال رہے کہ طیب اردوان نے ایک ہفتہ قبل قوم سے وعدہ کیا تھا کہ جلد ہی اچھی خبر ملے گی اور جمعے کو اچھی خبر قدرتی گیس کے ذخائر کی دریافت کے حوالے سے سامنے آئی۔

ان کا کہنا تھا کہ بحیرہ اسود کے اطراف کے خطے میں قدرتی گیس ملنے کے امکانات تھے اور یہ گیس عام شہریوں کے استعمال کے لیے 2023 میں دستیاب ہوگی۔

ترک صدر نے کہا کہ ترکی اس وقت تک آرام سے نہیں بیٹھے گاجب تک تیل اورگیس برآمد کرنے والا خطےکابڑاملک نہیں بنتا۔

واضح رہے کہ یونان اورمصرکی جانب سے حدود بندی کے متنازع معاہدے کے بعد گزشتہ ہفتے ہی ترکی نے مشرقی بحیرہ روم میں تیل کی تلاش کا کام شروع کردیا تھا۔

بحیرہ روم میں ترکی کی جانب سے گیس اور تیل کے تلاش کے کام پر یونان کے ساتھ تعلقات کشیدہ ہوگئے تھے اور دونوں ممالک نے اپنی افواج کو الرٹ رہنے کا بھی حکم دے دیا تھا۔