قومی احتساب بیورو(نیب) نے قومی اسمبلی میں اپوزیشن لیڈر اور صدر مسلم لیگ نون شہباز شریف کے بے نامی اثاثہ جات کی مالیت ظاہر کردی۔

تفصیلات کے مطابق شہباز شریف کے بے نامی اثاثوں کی مالیت 7 ارب 5 کروڑ 87 لاکھ روہے ہے۔

نیب کی جانب سے جاری  دستاویزات کے مطابق شہبازشریف کے ظاہر اثاثوں کی مالیت 26 کروڑ 93 لاکھ ایک ہزار روپے ہے۔ شہباز شریف کے بے نامی داروں میں جائیدادیں، 3 کمپنیاں، خفیہ بینک اکاؤنٹس اور شئیرز شامل ہیں۔

نیب لاہور کی  مرتب کردہ دستاویز کے مطابق شہبازشریف کی بے نامی کمپنی یونی ٹاس اور گڈ نیچر کے اثاثوں کی مالیت 1 ارب 88 کروڑ 48 لاکھ 17 ہزارروپے ہے۔

مسلم لیگ ن کے صدر شہباز شریف کی بے نامی کمپنی نثار ٹریڈنگ کے اثاثوں کی مالیت 51 کروڑ 52 لاکھ 71 ہزار روپے ہے۔

نیب کو شہباز شریف کی جانب سےغیر ظاہر شدہ بنکوں میں 27 کروڑ 13 لاکھ 39 ہزار روپے کی موجودگی کے شواہد ملے ہیں۔

دستاویز کے مطابق شہباز شریف کے شئیرز کی مالیت 1 ارب 20 کروڑ اور 60 لاکھ ہے جب کہ شریف فیملی کے بے نامی دار اراکین کے اثاثوں کی مالیت 3 ارب 18 کروڑ 13 لاکھ 55 ہزار روپے ہے۔

شہباز شریف کے بے نامی داروں میں نصرت شہباز، سلمان شہباز، حمزہ شہباز، رابعہ عمران اور جوریہ علی شامل ہیں۔