معاون خصوصی برائے قومی سلامتی ڈاکٹر معید یوسف نے کہا ہے کہ پاکستان کا نیا سیاسی نقشہ اقوام متحدہ کی قرارداد کی ترجمانی کرتا ہے۔

تفصیلات کے مطابق معاون خصوصی برائے قومی سلامتی ڈاکٹر معید یوسف نے ایس سی او کے اجلاس میں بول نیوز سے گفتگو کرتے ہوئے کہا کہ پاکستان کا نقشہ اجلاس میں واضح طور پر دکھایا گیا جبکہ پاکستان کا نیا سیاسی نقشہ اقوام متحدہ کی قرارداد کی ترجمانی کرتا ہے۔

معاون خصوصی برائے قومی سلامتی نے کہا کہ 11 ستمبر کو بھارت نے روس سے پاکستان کے نقشے پر اعتراض اٹھایا تھا جبکہ گذشتہ رات پاکستان کو اعتراض کے بارے میں بتایا گیا تھا لیکن ہم نے روس کو تحریری جواب دیا، ہمارا نقطہ نظر واضح تھا اور روس نے اس کی تائید کی۔

ڈاکٹر معید یوسف نے یہ بھی کہا کہ اجیت ڈول اجلاس چھوڑ کر چلے گئے جبکہ اجیت ڈول نے روسی قومی سلامتی کے مشیر کی تقریر بھی نہ سنی۔

معاون خصوصی برائے قومی سلامتی ڈاکٹر معید یوسف نے مزید کہا کہ شنگھائی تعاون تنظیم اجلاس میں بھارت منہ کی کھا کر چلاگیا ، بھارتی حکومت نے  خود کو مذاق بنادیا تھا جبکہ بھارت کو خود لگ رہا ہی کہ کشمیراسکے ہاتھوں سے جارہا ہے۔

واضح رہے اس سے قبل معاون خصوصی برائے قومی سلامتی ڈاکٹر معید یوسف نے ایس سی او کی قومی سلامتی کونسل سکریٹریوں کے اجلاس سے خطاب کرتے ہوئے کہا تھا کہ معاشی راہداری حکومت کی اولین ترجیح ہے،

ڈاکٹر معید یوسف کا مزید کہنا تھا کہ عالمی برادری کو مقبوضہ علاقوں میں ریاستی دہشت گردی کے مرتکب ممالک کی مذمت کرنی چاہیے ، ہمیں قوم پرستی، فاشزم اور مذہبی انتہاپسندی کے خلاف متحد ہونا ہے۔