وزیراعظم عمران خان نے کہا ہے کہ پاکستانی نوجوانوں میں رضاکارانہ خدمات کا بہت جذبہ ہے۔

تفصیلات کے مطابق وزیراعظم عمران خان نے گرین انڈیکس ایوارڈ کی تقریب سے خطاب کرتے ہوئے کہا کہ پاکستان میں خیرات دینےکابہت جذبہ ہے۔

وزیراعظم نے کہا کہ پاکستانی نوجوانوں میں رضاکارانہ خدمات کا بہت جذبہ ہے کینسراسپتال بنانےمیں عام لوگوں نے بھی اپناحصہ ڈالا، شوکت خانم اسپتال بنانےکےدوران قوم کےجذبےسےبہت متاثرہوا۔

عمران خان نے یہ بھی کہا کہ بدقسمتی سے پاکستانی عوام کے جذبے سے بھرپور فائدہ نہیں اٹھایا جارہا جبکہ پاکستان کا کوئی ایسا حصہ نہیں جہاں میں نہیں گیا۔

وزیراعظم کا کہنا تھا کہ ہمارےنبیﷺنےفرمایا صفائی نصف ایمان ہے جبکہ اللہ تعالیٰ نے پاکستان کو بہت نعمتوں سے نوازا ہے، شاید ہی کسی ملک میں اتنی نعمتیں ہوں جتنی اللہ نے ملک کوبخشی ہیں۔

عمران خان کا یہ بھی کہنا تھا کہ پاکستان میں اپنی آنکھوں سے جنگلات کو تباہ ہوتے دیکھا،20سال کے دوران لاہور سے 70فیصد درخت کاٹ دیئے گئے۔

وزیراعظم نے کہا کہ معاشرہ فضائی اورپانی کی آلودگی کی پراہ ہی نہیں کرتا لیکن ہمیں آئندہ نسلوں کےلیےابھی سےفوری اقدامات کی ضرورت ہے۔

عمران خان نے یہ بھی کہا کہ ہندوستان کےمقابلےمیں ہم نے لوگوں کو زیادہ معاشی تباہی سے بچایا، کورونا کی وجہ سے ساری دنیا میں معاشی بدحالی ہوئی جبکہ ہمیں ڈرہےاکتوبر،نومبرمیں آلودگی کی وجہ سےکوروناپھرسےنہ پھیل جائے۔

وزیراعظم عمران خان نے مزید کہا کہ کراچی میں بھی ہرجگہ کچرااور براحال ہے، پانی بھی گندا ہوگیا کیونکہ سمندرمیں کراچی کا ساراسیوریج پھینکا جارہا ہے جبکہ لوگوں کو سمجھانا ہے کہ آلودگی پھیلا کر ہم ملک کی تباہی کررہے ہیں۔