سموسہ ہو اور وہ بھی آلو کا تو کوئی بھی موسم ہو، آلوکے سموسے کھانے کا ایک الگ ہی لطف آتا ہے۔ خستہ خستہ گرم گرم سموسے ہر کسی کو ہی پسند ہوتے ہیں۔ ہری چٹنی اور کیچپ کے ساتھ اگر چائے کا اہتمام بھی کرلیا جائے تو سموسہ کھانے کا مزہ دوبالا ہوجائے۔

آلو کے سموسے کی آسان ترین ریسپی کو فالو کرکے گھر پر ہی اس سے لطف اندوز ہوا جاسکتا ہے۔

اجزاء

ابلے آلو ۔۔ آدھا کلو

ہری مرچ ۔۔۔ دو عدد

پیاز ۔۔ ایک عدد

گھی ۔۔ 150 گرام

ٹماٹر ۔۔ آدھا

انار دانہ ۔۔ حسب ذوق

کٹا دھنیا ۔۔ ایک چائے کا چمچ

پسا گرم مصالحہ ۔۔ حسب ضرورت

کٹی لال مرچ ۔۔ حسب ضرورت

نمک ۔۔ ایک سے آدھا چائے کا چمچ

ڈو بنانے کے لئے

میدہ ۔۔ 500 گرام

گھی ۔۔ 100 گرام

تیل ۔۔ تلنے کے لئے

زیرہ ۔۔ حسب ضرورت

نمک ۔۔ حسب ذوق

ترکیب

ایک پین میں گھی گرم کر کے باریک کٹی پیاز، ہری مرچ اور ٹماٹر ڈال کر تھوڑا بھون لیں۔ اب اس میں کٹی لال مرچ، کٹا دھنیا اور نمک شامل کردیں۔ پھر اس میں ابلے اور پسے آلو مکس کرلیں۔

 اس کے بعد اناردانہ ڈالیں۔ اگر ضرورت ہو تو ہرا دھنیا بھی شامل کر سکتے ہیں۔

 ڈؤ کے لئے گھی میں پانی ڈال کر مکس کرلیں اب اس میں نمک اور زیرہ شامل کر دیں۔ پھر اس میں میدہ ڈال کر گوند لیں۔

 اب میدے کے پیڑے بناکر روٹی کی شکل میں بیل لیں اور تکون کاٹ لیں۔ اب اس میں آلو کا مکسچر ڈال کر بند کریں اور گرم تیل میں ڈپ فرائی کرلیں۔ خستہ خستہ سموسے تیار ہیں۔