وفاقی دارالحکومت میں چینی 85روپے فی کلو کے ریٹ پر فراہم کردی گئی۔

ضلعی انتظامیہ کی لگائی گئی فئیر پرائس شاپس پر چینی 85 روپے فی کلو کی قیمت پر فراہم کردی گئی۔

 ڈی سی کی جانب سے جاری بیان کے مطابق شہری فئیر پرائس شاپس سے حکومتی نرخوں پر چینی خرید سکتے ہیں۔

یاد رہے اس سے قبل حکومت نے مزید 26 ہزار ٹن درآمدی چینی یوٹیلیٹی اسٹورز کو دینے کا فیصلہ کیا تھا۔

ذرائع کا کہنا تھا کہ مقامی کے مقابلے درآمدی چینی 15 روپے فی کلو سستی پڑ رہی ہے جبکہ یوٹیلیٹی اسٹورز کو مزید درآمدی چینی جلد ملنا شروع ہوجائے گی۔

ذرائع کا یہ بھی کہنا تھا کہ یوٹیلیٹی اسٹورز کو 25 ہزار ٹن درآمدی چینی پہلے ہی فراہم کی جا چکی جبکہ درآمدی چینی یوٹیلیٹی اسٹورز کو 82 روپے کلو میں پڑ رہی ہے۔

واضح رہے کہ وزیراعظم پیکچ میں چینی خریداری کا ایک اور ٹینڈر منسوخ کردیا گیا تھا۔

اس ضمن میں ذرائع کا کہنا تھا کہ یوٹیلیٹی اسٹورز نے 35 ہزار ٹن کا مسلسل تیسرا ٹینڈر بھی منسوخ کردیا ہے کیونکہ یوٹیلیٹی اسٹورز نے شوگر ملوں سے مہنگی چینی خریدنے سے انکار  کردیا ہے۔

ذرائع نے بتایا تھا کہ شوگر ملز نے دو ٹینڈرز میں یوٹیلیٹی اسٹورز کو چینی بیچنے سے انکار کیا تھا جبکہ اب یوٹیلیٹی اسٹورز کا شوگر ملز سے مہنگی چینی خریدنے سے انکار کردیا ہے۔