پی ٹی آئی نے سندھ حکومت کی کورونا سے متعلق ناقص پالیسی مسترد کردی


وریشہ مسعودویب ایڈیٹر

25th November, 2020
پی ٹی آئی
Square ad 300 x 250

پاکستان تحریک انصاف نے سندھ حکومت کی کورونا سے متعلق ناقص پالیسیوں کومسترد کردیا۔

تفصیلات کے مطابق سندھ اسمبلی میں قائد حزب اختلاف فردوس شمیم نقوی نے پی ٹی آئی رہنماء خرم شیر زمان  کے ہمراہ انصاف ہاوس میں پریس کانفر نس سے خطاب کرتے ہوئے کہا کہ مراد علی شاہ نے پہلے بھی سازش کر کے ملک کی معیشت کو تباہ کرنے کی کوشش کی تھی جس پر ہمیں انہیں بھرپور جواب دینا پڑا۔

سندھ اسمبلی میں قائد حزب اختلاف نے کہا کہ ہماری حکومت کے دانشمندانہ فیصلوں کی بدولت پاکستان کورونا پر قابو پانے والے دس بہترین ممالک میں شمار ہونے لگا ہے۔

فردوس شمیم نقوی نے یہ بھی کہا کہ یہ وزیرا عظم عمران خان کی حکمت عملی تھی کہ ہمارا ملک مکمل لاک ڈاون کا متحمل نہیں ہو سکتا لیکن سندھ حکومت نے ایسے فیصلے لئے ہیں جن کا کوئی جواز نہیں بنتا۔

سندھ اسمبلی میں قائد حزب اختلاف فردوس شمیم نقوی کا کہنا تھا کہ پیپلز پارٹی کے قول اور فعل میں تضاد نظر آتھا ہے،ایک طرف لاک ڈاون کی بات کی جارہی ہے تو دوسری طرف جلسوں میں شرکت کے لئے عوام کو دعوت دی جارہی ہے۔

اس موقع پر پی ٹی آئی رہنماء خرم شیر زمان نے کہا کہ پیپلز پارٹی ہمیشہ مشکل کے وقت سندھ کے ساتھ سوتیلی ماں جیسا سلوک کرتی ہے،ہم سندھ حکومت کی پالیسیوں کو مکمل طورپر مسترد کرتے ہیں۔

خرم شیر زمان نے یہ بھی کہا کہ بلاول کو تکلیف ہے کہ وزیراعظم کی پالیسیوں کو پوری دنیا میں کیوں سراہا جارہا ہے جبکہ پیپلز پارٹی اپنی دکانیں کھلی رکھ کر عوام کی دکانیں بند کروانا چاہتی ہے۔

پی ٹی آئی رہنماء خرم شیر زمان نے مزید کہا کہ ریسٹورنٹس اور کنسٹرکشن انڈسٹری سے وابستہ مسائل کو حل کیا جائے، ان سے لاکھوں لوگوں کا روزگار وابستہ ہے۔