ترکی نے ایرانی جوہری سائنسدان محسن فخری زادے کی ہلاکت کو دہشتگردی قرار دیتے ہوئے کہا ہے کہ اس سے خطے کا امن تباہ ہوگا۔ ترک وزارت خارجہ نے اپنے ایک بیان میں کہا ہے کہ ہمیں محسن فخری زادے کی مسلح حملے میں ہلاکت پر افسوس ہے۔

ترک وزارت خارجہ نے کہا ہے ہم اس مکروہ قتل کی مذمت کرتے ہیں، بیان میں ایرانی حکومت اور مرحوم کے لواحقین کیساتھ اظہار ہمدردی بھی کیا گیا۔

 بیان میں کہا گیا کہ ہم دہشتگردی کی ان تمام اشکال کی مذمت کرتے ہیں جس کا مقصد خطے کا امن تباہ کرنا ہو خواہ اس کے منصوبہ ساز یا اس کا ہدف کوئی بھی ہو۔

خیال رہے کہ ایرانی سائنسدان محسن فخری زادہ پر جمعے کو دماوند کے علاقے ابسرد میں حملہ کیا گیا تھا جس کے بعد وہ ہسپتال میں ہلاک ہوگئے تھے۔

ایران نے اعلان کیا تھا کہ وہ اپنے سینیئر جوہری سائنسدان محسن فخری زادہ کی ہلاکت کا بدلہ لے گا جبکہ ایرانی حکام کی جانب سے عندیہ دیا گیا تھا کہ اس معاملے میں اسرائیل ملوث ہے۔

تاہم اب ایران کے صدر نے اسرائیل پر اس حملے کا براہِ راست الزام عائد کرتے ہوئے کہا ہے کہ ’متعلقہ حکام مناسب وقت پر اس جرم کا جواب دیں گے۔‘