سابق صدر آصف ذرداری کی صاحبزادی آصفہ بھٹو کا خصوصی طیارہ ملتان ائیرپورٹ لینڈ کرگیا ہے۔

تفصیلات کے مطابق ملتان میں پی ڈی ایم کے جلسے میں شرکت کیلئےآصفہ بھٹو خصوصی طیارے کے ذریعے کراچی سے ملتان پہنچ گئی ہیں،  پارٹی رہنماوں سعید غنی ،نفیسہ شاہ،ناصر حسین اور علی حیدر گیلانی نے آصفہ بھٹو کو ائیر پورٹ پر خوش آمدید کہا ۔

ذرائع کے مطابق آصفہ بھٹو ایئرپورٹ سے گیلانی ہاؤس جائیں گی،جبکہ آصفہ بھٹو اور یوسف رضا گیلانی ریلی کی قیادت کریں گے۔

مریم نواز موٹر وے یا جی ٹی روڈ سےآسکتی ہیں، کارکنان چونگی نمبر 9 پر مریم نواز کا استقبال کریں گے۔

واضح رہےکہ پاکستان مسلم لیگ ن کی نا ئب صدرمریم نواز نے ملتان روانگی سے قبل جاتی امرامیں میڈیا سے گفتگو کر تے ہو ئے کہا کہ ملتان کے لئے نکل رہی ہوں ذاتی غم پیچھے چھوڑ کر، والد اور فیملی موجود نہیں ہے۔

مسلم لیگی رہنما کا کہنا ہے کہ گھروں پر مشکلات آتی ہیں تو بیٹیاں باہر نکلتی ہیں، مریم نواز اور آصفہ بھٹو باہر نکل رہی ہیں اور یہ حکومت گھر جارہی ہے ،ملتان کے عوام اس حکومت کو دھکا دینے کیلئے ساتھ نکلیں۔

انھوں نے کہا کہ جس طرح ملتان کو اکھاڑہ بنا کر رکھ دیا ہے وہ ظلم مجھے ملتان لے کر جارہا ہے
جلسہ اسٹیڈیم سے اندر ہو یا باہر ہو جلسہ ہوگا، جلسہ کامیاب ہوگیا ہے یہ جلسہ ان کے خوف کی عکاسی کرتا ہے۔

مریم نواز نے کہا کہ ملتان کی عوام ہمارے ساتھ شامل ہوں،ملتان میں ن لیگ سے پہلے پولیس کا جلسہ ہورہا ہے، پولیس والے بھی تنگ ہیں ، حکومت کورونا سے نہیں ڈر رہی اپوزیشن سے ڈر رہی ہے،کیا کورونا لوگوں کی گنتی کرتا ہے اندرجاوں یا نہ جاوں، کیا کورونا دیکھتاہے کہ یہ حکومتی جلسہ ہےہا اپوزیشن کاجلسہ ہے۔

واضح رہےکہ سابق صدر آصف علی ذرداری کی صاحبزادی آصفہ بھٹو پی ڈی ایم کے ملتان جلسے سےآج خطاب کریں گی۔

 پاکستان ڈیمو کریٹک موومنٹ (پی ڈی ایم) آج ملتان میں سیاسی قوت کا مظاہرہ کرے گی، پی ڈی ایم کی جانب سے قافلوں کی آمد کا شیڈول طے پاگیا۔

سابق صدر آصف علی ذرداری کی بیٹی آصفہ بھٹو صبح 11 بجے گیلانی ہاؤس سے ریلی کی صورت میں قاسم باغ روانہ ہونگی۔

مولانا فضل الرحمان بھی جامعہ قاسم العلوم سے 11 بجے روانہ ہونگے تاہم سابق وزیراعظم نواز شریف کی صاحبزادی اور مسلم لیگ ن کی نائب صدرمریم نواز ملتان 9 نمبر چونگی پر 11 بجے پہنچیں گی۔

دوسری جانب ضلعی انتظامیہ نے بھی کمر کس لی، جگہ جگہ رکاوٹیں کھڑی کی جا رہی ہیں، کنٹینر لگا کر راستے بلاک کر دئیے گئے۔

ملتان میں پی ڈی ایم کا جلسہ روکنے کیلئے پولیس کی جانب سے کئی شہروں میں پکڑ دھکڑ کی گئی۔

پولیس نے ملتان گھنٹہ گھر چوک میں نواز لیگ کی ریلی نکالنے کی کوشش ناکام بنا دی، گھنٹہ گھر کو چاروں طرف سے سیل کر دیا گیا۔

ملتان میں قلع کہنہ قاسم باغ اسٹیڈیم پر انتظامیہ کا کنٹرول برقرار ہے، لاٹھیوں اور آنسو گیس سے لیس اہلکار بھی مظاہرین سے نمٹنے کے لیے تیار ہیں۔

پاکستان ڈیمو کریٹک موومنٹ (پی ڈی ایم) کے جلسے کے باعث انتظامیہ نے کل ملتان میں میٹرو بس سروس بند رکھنے کا اعلان کردیا۔

جے یو آئی (ف) کے سربراہ مولانا فضل الرحمان کا کہنا تھا کہ کوئی طاقت نہیں روک سکتی، ملتان پی ڈی ایم کا جلسہ ہوکر رہے گا، حکومت اوچھے ہتھکنڈے اپنا رہی ہے، جیلیں بھر دیں گے لیکن پیچھے نہیں ہٹیں گے۔

 پاکستان مسلم لیگ (ن) کی مرکزی نائب صدر مریم نواز کا کہنا تھا کہ کل تمام رکاوٹیں توڑ کر ملتان میں ملاقات ہو گی۔

انہوں نے مزید کہا کہ پی ڈی ایم ایک پرامن تحریک ہے، پی ڈی ایم کی تحریک کا مقصد  ملک میں حقیقی جمہوریت کا قیام، ووٹ کی عزت اور بنیادی حقوق کی بحالی ہے۔

یوسف رضا گیلانی نے بتا یا کہ پاکستان پیپلز پارٹی کے چیئر مین بلاول بھٹو زرداری کورونا وائرس کے باعث 30 نومبر کے تاسیسی جلسے میں شریک نہیں ہوسکتے ہیں۔

انہوں نے کہا کہ حکومت جلسہ روک کر حالات خراب کررہی ہے، 30 نومبر کوجلسہ ہر صورت ہوگا۔

یاد رہےکہ گزشتہ ہفتے چیئرمین پیپلزپارٹی بلاول بھٹو زرداری نے کہا کہ حکومت ملتان میں کارکنوں کی گرفتاریاں کر رہی ہے، کٹھ پتلیاں جیالوں سے خوف زدہ ہیں۔

سوشل میڈیا پر اپنے پیغام میں بلاول بھٹو نے کہا کہ جو کرنا ہے کر لیں، ہمیں پی ڈی ایم قائدین کے ہمراہ یوم تاسیس منانے سے کوئی نہیں روک سکتا، وفاقی حکومت نے ملتان میں کارکنان کی گرفتاریوں کا سلسلہ جاری رکھا ہواہے۔

Fascist regime continues to arrest Democratic activists in Multan. These puppets are scared of jiyalas. Try as they might they cannot stop PPP from marking our foundation day along with PDM leaders on 30th November. https://t.co/5DrIYbg0KF

Advertisement

— BilawalBhuttoZardari (@BBhuttoZardari) November 27, 2020