صوبائی وزیر صنعت وتجارت میاں اسلم اقبال نے کہا ہے کہ صوبے میں نئے سیمنٹ پلانٹ لگنے سے اربوں روپے کی سرمایہ کاری ہوگی۔
تفصیلات کے مطابق صوبائی وزیر صنعت وتجارت میاں اسلم اقبال سے بیسٹ وے سیمنٹ گروپ کے وفد کی بریگیڈیئر سید کوثر حسین(ر)کی قیادت میں ملاقات ہوئی ہے۔
پنجاب سرمایہ کاری بورڈ کے کمیٹی روم میں ہونے والی ملاقات کے دوران بیسٹ وے سیمنٹ گروپ کی جانب سے اٹک،میانوالی اور خوشاب میں نئے سیمنٹ پلانٹ لگانے کے امور پر بات چیت کی گئی۔
بیسٹ وے سیمنٹ گروپ نے کہا کہ ہمارے گروپ نے اٹک،میانوالی اور خوشاب میں نئے سیمنٹ پلانٹس لگانے کے لئے اپلائی کررکھا ہے،این او سی کے منتظر ہیں۔
بیسٹ وے سیمنٹ گروپ نے یہ بھی کہا کہ ہمارگروپ این اوسی ملتے ہی سیمنٹ انڈسٹری میں اربوں روپے کی نئی سرمایہ کاری کرے گا۔
صوبائی وزیر صنعت وتجارت میاں اسلم اقبال نے کہا کہ پنجاب حکومت نے سرمایہ کاروں کو سرمایہ کاری کے حوالے سے ون ونڈو کی سہولت دی ہے۔
صوبائی وزیر صنعت وتجارت نے کہا کہ صوبے میں نئے سیمنٹ پلانٹس لگانے کے لئے این او سی کے اجراء کے عمل کو تیز کیا گیا ہے جبکہ متعلقہ محکموں کو ٹائم لائن کے اندر این او سی کے اجراء کا پابند بنایا گیا ہے۔
میاں اسلم اقبال نے یہ بھی کہا کہ بیسٹ وے سیمنٹ گروپ کی اٹک،خوشاب اور میانوالی میں سیمنٹ سیکٹر میں نئی سرمایہ کاری خیر مقدم کرتے ہیں، صوبے میں نئے سیمنٹ پلانٹ لگانے کے لئے پانچ این او سی جاری ہوچکے،مزید پانچ این او سی جلد جاری ہوں گے۔
صوبائی وزیر صنعت وتجارت میاں اسلم اقبال نے مزید کہا کہ این او سی حاصل کرنے والی کمپنیوں کو 6 ماہ کے اندر پلانٹ لگانے کا بھی پابند بنایا جائے گا جبکہ ان علاقوں میں بیسٹ وے سیمنٹ گروپ کوسیمنٹ پلانٹس لگانے کے لئے این او سی کے جلد اجراء کو یقینی بنایا جائے گا۔
ایڈیشنل سیکرٹری معدنیات،ڈی جی معدنیات،بیسٹ وے گروپ کے ارشاد علی،ضیغم عباس اور کرنل ثاقب ملک بھی ملاقات میں موجود تھے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News