آج کل کے اس جدید دور میں ناصرف خواتین کا فیشن بلکہ مردوں کے فیشن میں بھی بے حد تبدیلی آئی ہے۔

کپڑے ہوں یا جوتے، بالوں کا ہئیر اسٹائل ہو یا کوئی اور فیشن لڑکے کسی سے پیچھے نہیں۔

تاہم کچھ چیزیں ایسی ہوتی ہیں جو ہم استعمال کر رہے ہوتے ہیں لیکن ہمیں ان کا مقصد، فائدہ یا نقصان کے بارے میں علم نہیں ہوتا۔

بات کریں اگر جوتوں کی تو مرد حضرات کو نئے اور منفرد قسم کے جوتے پہننے کا بے حد شوق ہوتا ہے، کئی سال پرانا فیشن تھا جب لڑکے اور مرد ایسے جوتے پہنتے تھے جن میں سوراخ ہو۔ لیکن کیا یہ سوراخ صرف فیشن کی حد تک جوتوں پر بنائے گئے تھے؟

اس کا جواب ہے ہرگز نہیں! ان جوتوں کا نام بروگ ہے، جو کہ اسکاٹ لینڈ اور آئرلینڈ میں پہلی بار تیار کیے گئے تھے، آئرش لفظ بروگ کا مطلب ہی سخت اور مضبوط ہے۔

یہ جوتے دراصل ان لوگوں کے لئے ایجاد کیے گئے تھے جن کا کام گھر یا آفس سے باہر ہوتا ہے۔

یعنی انجینئر یا محنت کش وغیرہ، عام جوتے ایسے محنت والے کاموں میں پھٹ جاتے ہیں، اسی لیے ایسے افراد کے لیے ان جوتوں کی ایجاد ہوئی۔

تاہم ان جوتوں میں سوراخ اس وجہ سے ہوتے ہیں کہ اگر کام کے دوران آپ کسی پانی والی جگہ میں ہیں اور پاؤں پانی میں ہے تو ان سوراخوں کے ذریعے پانی جوتوں میں جمع ہونے کے بجائے باہر نکل جاتا ہے اور یوں آپ کے پاؤں محفوظ رہتے ہیں۔