وزیرِ اعظم عمران خان نے کہا ہے کہ ڈیش بورڈ کو ترجیحی بنیادوں پر فعال کیا جائے۔

تفصیلات کے مطابق وزیرِ اعظم عمران خان کی زیرِ صدارت ترجیحی شعبوں کے حوالے سے اجلاس ہوا جس میں وزیرِ اعظم کو سسٹین ایبل ڈولپمنٹ پالیسی انسٹیٹیوٹ کے تعاون سے بنائے گئے فوڈ سیکیورٹی ڈیش بورڈ پر پیش رفت پر بریفنگ دی گئی ۔

اجلاس میں چینی کی فروخت کی کڑی نگرانی اور آٹا چکیوں سے معلومات کے حصول سے بھی آگاہ کیا گیا جس پر وزیرِاعظم نے ان اقدامات کو سراہا۔

اجلاس میں مخدوم خسرو بختیار، سید فخر امام، عبدالرزاق داؤد ، ڈاکٹر معید یوسف اور متعلقہ اعلیٰ افسران شریک ہوئے جبکہ چاروں صوبوں کے چیف سیکریٹریز نے وڈیو لنک کے ذریعے شرکت کی۔

بریفنگ کے دوران کہا گیا کہ ڈیش بورڈ کو تکنیکی طور پر مکمل کرکے وزارتِ فوڈ سیکیورٹی کے حوالے کر دیا گیا ہے جبکہ ڈیش بورڈ کی مدد سے فیصلہ سازی کیلئے درکار ڈیٹا کے حصول کو صوبوں کی مدد سے یقینی بنایا جا رہا ہے۔

بریفنگ کے دوران مزید کہا گیا کہ صوبوں کے متعلقہ محکموں کی استعداد بڑھائی جا رہی ہے، ڈیٹا کا حصول نجی و سرکاری ذرائع سے یقینی بنایا جائے گا اور ڈیش بورڈ میں چینی اور گندم، کم معیاد والی اجناس سبزیوں کی کھپت اور دستیابی کی نگرانی بھی کی جائے گی۔

اجلاس میں وزیرِ اعظم عمران خان نے کہا کہ ڈیش بورڈ کو ترجیحی بنیادوں پر فعال کیا جائے، آنے والے دس سالوں میں فوڈ سیکیورٹی پاکستان کیلئے نہایت اہمیت کی حامل ہے۔

عمران خان نے یہ بھی کہا کہ منصوبے پر سختی سے عمل کیا جائے جبکہ ایسے ادارے جو ڈیٹا کی فراہمی میں سست روی اختیار کئے ہوئے ہیں انکے خلاف کاروائی یقینی بنائی جائے۔

وزیرِ اعظم عمران خان نے شوگر ملز سے چینی کی فروخت کی شفاف طریقے سے نگرانی کی ہدایت کرتے ہوئے کہا کہ درست ڈیٹا مستقبل میں بحرانوں سے بچنے کیلئے فیصلہ سازی کیلئے کلیدی اہمیت رکھتا ہے۔