وزیر خارجہ مخدوم شاہ محمود قریشی نےکہا کہ پاکستان اور کویت کے مابین, یکساں مذہبی اور ثقافتی اقدار کی بنیاد پر استوار گہرے تاریخی برادرانہ تعلقات ہیں۔

تفصیلات کے مطابق کویتی وفد کی نائب وزیر خارجہ برائے ایشیائی امور علی سلیمان آل سعید کی قیادت میں وزارتِ خارجہ میں وزیر خارجہ مخدوم شاہ محمود قریشی سے ملاقات ہوئی۔

دوران ملاقات دو طرفہ تعلقات ،مختلف شعبہ جات میں دو طرفہ تعاون ،خطے کی صورتحال سمیت باہمی دلچسپی کے امور پر تبادلہ خیال کیا گیا۔

دوران ملاقات پاک چین اقتصادی راہداری کے حوالے سے بھی تفصیلی تبادلہ ء خیال ہوا جبکہ فریقین نے پاکستان اور کویت کے درمیان اقوام متحدہ، او آئی سی اور دیگر عالمی فورمز کی سطح پر دو طرفہ تعاون کو اطمینان بخش قرار دیتے ہوئے، باہمی دلچسپی کے امور پر مشترکہ کاوشیں بروئے کار لانے پر اتفاق کیا۔

وزیر خارجہ مخدوم شاہ محمود قریشی نے معزز مہمانوں کو وزارت خارجہ آمد پر خوش آمدید کہا۔

کویتی نائب وزیر خارجہ نے کویتی وزیر خارجہ کی جانب سے وزیر خارجہ مخدوم شاہ محمود قریشی کیلئے نیک خواہشات کا پیغام دیا۔

وزیرخارجہ نے کویتی قیادت کی طرف سے، جی سی سی ممبر ممالک کے باہمی تنازعات کے حل کیلئے کی جانیوالی سفارتی کاوشوں کو سراہا جبکہ پاکستان اور کویت کے مابین برادرانہ مراسم کو مزید مستحکم بنانے کیلئے کثیرالجہتی شعبہ جات میں دو طرفہ تعاون کے فروغ کی ضرورت پر زور دیا۔

وزیر خارجہ نے کہا کہ کویتی وزیر خارجہ کے دورہ ء پاکستان کے منتظر ہیں۔

شاہ محمود قریشی نے یہ بھی کہا کہ پاکستان اور کویت کے مابین تجارت، سرمایہ کاری، لیبر کے تبادلے اور فوڈ سیکورٹی کے حوالے سے دو طرفہ تعاون بڑھانے کے وسیع مواقع موجود ہیں۔

وزیر خارجہ شاہ محمود قریشی نے مزید کہا کہ پاکستان اور کویت کے مابین روابط کا فروغ، دو طرفہ تعاون کو وسعت دینے میں معاون ثابت ہو گا۔

ملاقات میں کویتی نائب وزیر خارجہ برائے ایشیائی امور علی سلیمان آل سعید نے وزیر خارجہ مخدوم شاہ محمود قریشی کا شکریہ ادا کرتے ہوئے کہا کہ کویت، پاکستان کے ساتھ دو طرفہ تعلقات کو خصوصی اہمیت دیتا ہے اور انہیں مزید مستحکم بنانے کا متمنی ہے۔

پاکستان میں کویت کے سفیر نصر المطہری بھی اس ملاقات میں موجود تھے۔