پاکستان میں تعینات سعودی عرب کے سفیر نواف سعید المالکی نے کہا کہ ان کا ملک پاکستان کے ساتھ اپنے تجارتی تعلقات کو مزید مضبوط اور مستحکم بنانا چاہتا ہے کیونکہ دونوں ممالک کے درمیان متعدد شعبوں میں تجارت کو فروغ دینے کی عمدہ صلاحیت موجود ہے۔
اسلام آباد چیمبر آف کامرس اینڈ انڈسٹری کے دورے کے موقع پر تاجر برادری سے خطاب کرتے ہوئے سعودی سفیر نے کہا کہ ضرورت اس بات کی ہے کہ پاکستان کے مثبت پہلوؤں کو زیادہ اجاگر کیا جائے تاکہ غیر ملکی سرمایہ کار پاکستان کی طرف زیادہ راغب ہوں۔
انہوں نے یقین دلایا کہ وہ پاک سعودی تجارتی تعاون کو مزید فروغ دینے کے لئے اپنی کوششیں جاری رکھیں گے۔
اس موقع پر خطاب کرتے ہوئے اسلام آباد چیمبر آف کامرس اینڈ انڈسٹری کے صدر سردار یاسر الیاس خان نے کہا کہ پاکستان اور سعودی عرب کے درمیان تقریبا ساڑھے تین ارب ڈالر کی تجارت اصل صلاحیت سے بہت کم ہے۔
انہوں نے کہا کہ پاکستان کی بہت سی اعلی معیار کی مصنوعات بشمول حلال فوڈ پروڈکٹس، فارماسوٹیکلز، ٹیکسٹائل، آلات جراحی، چاول، پھل، ڈیری مصنوعات، کھیلوں کا سامان، چمڑے کی مصنوعات، فنانشل سروسز، انشورنس اور آئی ٹی سروسز اور دیگر سعودی عرب کی مارکیٹ میں بہتر مقبولیت حاصل کر سکتی ہے۔
انہوں نے مزید کہا کہ سی پیک کے تحت پاکستان میں متعدد اسپیشل اکنامک زونز قائم کئے جا رہے ہیں لہذا سعودی عرب کے سرمایہ کار ان میں جوائنٹ وینچرز اور سرمایہ کاری کے مواقع تلاش کریں۔
فاؤنڈر گروپ آئی سی سی آئی کے چیئرمین میاں اکرم فرید نے پاکستان کے مفادات کو فروغ دینے کے لئے سعودی سفیر کی کاوشوں کو سراہا۔
انہوں نے کہا کہ آئی سی سی آئی ایک نئی انڈسٹریل اسٹیٹ کے قیام کے لئے کوششیں کر رہا ہے لہذا سعودی عرب کے سرمایہ کار اس میں صنعتی یونٹس لگانے کے امکانات کا جائزہ لیں۔
اس موقع پر چیمبر کے صدر سردار یاسر الیاس خا ن اور سعودی سفیر نواف سعید المالکی نے دونوں اداروں کے درمیان باہمی تعاون کے ایک معاہدے پر دستخط کیے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News