ادارہ شماریات نے ہفتہ وار مہنگائی کی رپورٹ جاری کردی


ثمرا مظہرویب ایڈیٹر

26th February, 2021
Square ad 300 x 250

ادارہ شماریات نے ہفتہ وار مہنگائی کی رپورٹ جاری کردی ہے۔

ادارہ شماریات کی رپورٹ کے مطابق ایک ہفتے میں مہنگائی میں 2.41 فیصد کا اضافہ ہوگیا ہے جبکہ اس دوران  25 اشیاء ضروریہ کی قیمتوں میں اضافہ ریکارڈ کیا گیا۔

رپورٹ کے مطابق ایک ہفتے میں  5 اشیاء کی قیمتوں میں کمی اور 21 اشیاء کی قیمتوں میں استحکام رہا، اس دوران بجلی کی فی یونٹ قیمت میں 2 روپے 70 پیسے کا اضافہ ہوا۔

رپورٹ میں مزید بتایا گیا کہ زندہ مرغی کی فی کلو قیمت میں 5 روپے 25 پیسے کا اضافہ ریکارڈ کیا گیا ہے، برانڈڈ گھی اور خوردنی تیل کی قیمتوں میں بھی اضافہ ہوا ہے۔ اڑھائی کلو برانڈڈ گھی کے ٹن کی قیمت میں 8روپے 54 پیسے کا اضافہ ہوا۔

رپورٹ کے مطابق چینی فی کلو 8 پیسے مہنگی اور 20 کلو آٹے کا تھیلا 8 روپے 13 پیسے مہنگا ہوا جبکہ لہسن، دال مونگ، دال مسور،دال ماش، کپڑے، انڈے، خشک دودھ بھی مہنگے ہوئے، ٹماٹر 1 روپے 90 پیسے اور پیاز ایک روپیہ 9 پیسے سستے ہوئے۔

اس کے علاوہ رپورٹ کے مطابق گڑ اور جلانے کی لکڑی کی قیمت میں کمی ہوئی ہے۔