ملک میں مسلسل چوتھے ہفتے بھی مہنگائی میں اضافہ ہوگیا۔

ادارہ شماریات کے مطابق ایک ہفتے میں مہنگائی 0.81 فیصد مزید بڑھ گئی۔

ہفتہ وار مہنگائی کی شرح  9.17 فیصد ہوگئی جبکہ ملک میں چینی اور آٹے کی قیمتوں میں دوبارہ اضافے کا سلسلہ شروع ہے۔

ایک ہفتے میں چینی کی اوسط قیمت 3 روپے 37 پیسے فی کلو بڑھ گئی جس کے بعد ملک میں چینی کی اوسط قیمت بڑھ کر 93 روپے 59 پیسے فی کلو ہوگئی۔

آٹے کا 20 کلو کا تھیلا 23 روپے 88 پیسے مہنگا ہوگیا جس کے بعد 20 کلو آٹے کا تھیلا 970 روپے 18 پیسے کا ہوگیا۔

ایک ہفتے میں مرغی 11 روپے 47 پیسے فی کلو مہنگی ہوگئی، انڈے فی درجن 6 روپے 80 پیسے مہنگے ہوئے، گھی کا ڈھائی کلو کا ڈبہ 9 روپے 75 پیسے مہنگا ہوا، کیلے فی درجن 3 روپے 93 پیسے مہنگے ہوگئے جبکہ دال چنا ایک روپے 96 پیسے فی کلو مہنگی ہوئی۔

حالیہ ہفتے دال ماش,دال مونگ,دال مسور,چاول بھی مہنگے ہوئے۔

ایک ہفتے میں 24 اشیائے ضروریہ مہنگی ہوئی جبکہ ایک ہفتے میں 6 اشیائے ضروریہ کی قیمتوں میں کمی ہوئی۔

 ٹماٹر 7 روپے 50 پیسے فی کلو سستے ہوئے، آلو ایک روپے 47 پیسے فی کلو سستے ہوئے، پیاز 64 پیسے فی کلو سستے ہوئے جبکہ گذشتہ ہفتے لہسن اور گڑ بھی سستا ہوا۔