معاونِ خصوصی وزیراعلیٰ پنجاب برائے اطلاعات ڈاکٹر فردوس عاشق اعوان نے کہا ہے کہ مریم نواز کی سیاست عمران خان کا نام لینے سے زندہ ہے، پی ایس ایل کے بعد دلچسپ پی ایم ایل این لیگ شروع ہونے والی ہے۔

حمزہ شہباز کی رہائی پر رد عمل دیتے ہوئے  فردوس عاشق اعوان نے کہا کہ حاجی اور قیدی کے استقبال میں فرق رکھیں، قیدی کی رہائی کے لئے استقبالیہ حیران کن ہے۔

انہوں نے کہا کہ کرپشن کر کے حاجی بن کر عوام کو پاگل نہ بنائیں، مقدمہ ابھی ختم نہیں ہوا ضمانت ہوئی ہے۔

انہوں نے کہا کہ مریم نواز حمزہ شہباز کو کارکن اور خود کو لیڈر کے روپ میں دیکھتی ہیں، ایک میان میں دو تلواریں نہیں رہ سکتیں، پی ایس ایل کے بعد پی ایم ایل ن لیگ شروع ہوگی۔

فردوس عاشق اعوان کا کہناہے کہ پیپلز پارٹی سے گٹھ جوڑ کر کے ن لیگ نے سینیٹ میں دھاندلی کی بنیاد رکھ دی ہے۔

انہوں نے کہا کہ اگر یوسف رضا گیلانی اپنا ووٹ مانگ رہے ہیں تو پنجاب سے پیپلز پارٹی نے اپنا امیدوار کیوں واپس لیا ؟ ڈسکہ الیکشن کو یاد کر کے یہ خوشیاں منا رہے ہیں،ن لیگ کی زبانیں لمبی ہونے جا پتہ تھا لیکن ہاتھ اتنے لمبے ہیں یہ نہیں پتہ تھا۔

معاون خصوصی نے کہا کہ جاتی امرا سے کچھ نمبردار برآمد ہوئے،باقی سب نمبرداروں کو نان فنکشنل کردیاگیا، رائیونڈ سٹیٹ سے نمبرداری لاگو ہوتی رہی۔

انہوں نے کہاکہ تحریک انصاف نے عوامی نمبردار کو تعینات کیا جبکہ رائیونڈ میں اپنے کاروبار اور بچوں کے مفاد کی جھلک نظر آتی تھی۔