پاکستان پیپلزپارٹی کے سینئر نائب صدر نومنتخب سینیٹر یوسف رضا گیلانی نے کہا ہے کہ عمران خان میرے کردار پر تنقید سے قبل اپنے گریبان میں جھانکیں کہ انہوں نے ملک کا کیا حال کردیا ہے۔

تفصیلات کے مطابق پاکستان پیپلزپارٹی کے سینئر نائب صدر نومنتخب سینیٹر یوسف رضا گیلانی نے عمران خان کے خطاب پر ردعمل دیتے ہوئے کہا کہ عمران خان اپنی ہی پارٹی کے اراکین اسمبلی پر ووٹ بیچنے کا الزام لگا کر انہیں چور کہہ رہے ہیں۔

پاکستان پیپلزپارٹی کے سینئر نائب صدر نے کہا کہ عمران خان نے حفیظ شیخ کو جتوانے کے لئے خزانوں کے منہ کھول دیئے مگر اراکین اسمبلی نے ضمیر کا سودا نہ کیا۔

نومنتخب سینیٹر نے یہ بھی کہا کہ عمران خان نے اعتماد کا ووٹ لینے کا اعلان کرکے دراصل اپنی صفوں میں انتشار کا اعتراف کرلیا ہے۔

پاکستان پیپلزپارٹی کے سینئر نائب صدر نومنتخب سینیٹر یوسف رضا گیلانی نے مزید کہا کہ خان صاحب اگر آپ کو اقتدار چھوڑنے سے کوئی فرق نہیں پڑتا تو اب حکومت بچانے کے لئے اعتماد کا ووٹ کیوں مانگ رہے ہیں۔