یوسف رضا گیلانی کے صاحبزادے علی حیدر گیلانی نے کہا ہے کہ کوئی غلط کام نہیں کیا میرا ضمیر مطمئن ہے اور حکومتی ارکان سے ہی ووٹ مانگنے ہیں۔

تفصیلات کے مطابق اسلام آباد سے سینٹ کے امیدوار یوسف رضا گیلانی کے صاحبزادے علی حیدر گیلانی نے پریس کانفرنس کرتے ہوئے کہا کہ قومی اسمبلی کے تمام ارکان ہمارا حلقہ ہیں اور ووٹ مانگنا حق ہے۔

یوسف رضا گیلانی کے صاحبزادے نے کہا کہ عمران خان نے جس طرح ووٹ خریدا سب کے سامنے ہے،ہم پہلا الیکشن نہیں لڑ رہے اور ووٹ کے تقدس کا علم رکھتے ہیں جبکہ پی ڈی ایم کی تمام جماعتیں مل کر یہ الیکشن لڑ رہے ہیں اور ہمیں یقین ہے یوسف رضا گیلانی سینٹ الیکشن جیتیں گے۔

علی حیدر گیلانی نے یہ بھی کہا کہ پریس کانفرنس کے بعد بھی ووٹ مانگنے جاؤں گا جبکہ ویڈیو میں نظر آنے والے پی ٹی آئی ایم این اے سے ملاقات کی تھی اور ایم این اے سے آئندہ بھی ملاقات کروں گا۔

یوسف رضا گیلانی کے صاحبزادے کا کہنا تھا کہ ہر الیکشن میں ضمیر کا ووٹ ملتا ہے اور ہم نے ہمیشہ سے ضمیر کا ووٹ مانگا ہے، ووٹوں کی خریدوفروخت نہ کبھی کی اور نہ کریں گے

علی حیدر گیلانی کا یہ بھی کہنا تھا کہ پی ٹی آئی کے اراکین نے حفیظ شیخ کو ووٹ نہ دینے کی بات کی جبکہ پی ٹی آئی کے ایم این اے نے ووٹ کے استعمال کے بارے میں بھی مشاورت کی۔

یوسف رضا گیلانی کے صاحبزادے علی حیدر گیلانی کا مزید کہناتھا کہ پیپلزپارٹی جمہوری جماعت جمہوریت پر یقین رکھتی ہے جبکہ یوسف رضا گیلانی کے انتخاب لڑنے سے پارلیمان کو عزت مل رہی ہے۔