وفاقی وزیراطلاعات شبلی فراز کا کہنا ہےکہ وزیراعظم عمران خان کا سینیٹ الیکشن سے متعلق خدشہ صحیح ثابت ہوا ہے، سینیٹ الیکشن میں کرپشن ہوئی ہے۔

شبلی فراز نے میڈیا سے گفتگو کرتے ہوئے کہا ہے کہ وزیراعظم عمران خان کے شکرگزار ہیں، وزیراعظم الیکشن میں شفافیت کیلئے کوشاں ہیں۔

شبلی فراز کا کہنا ہے کہ ملکی تاریخ میں آج جمہوریت کے ساتھ مذاق ہوا ہے، یوسف رضا گیلانی کی کامیابی پر پارٹی میں مشاورت جاری ہے۔

وفاقی وزیر نے کہا کہ کل کی ویڈیو اور آج گیلانی کی جیت ہمارے موقف کی تائید ہے، خیبرپختونخوا میں تحریک انصاف کے تمام امیدوار کامیاب ہوئے ہیں۔

 شبلی فراز نے کہا کہ ہم صوبے کی ترقی جو وفاق سے وابستہ ہے، ان کے لیے بھرپور کوشش کریں گے، جن خدشات کا ذکر عمران خان کرتے رہے وہ صحیح ثابت ہوگئے ہیں۔

وزیر اطلاعات کا کہناتھا کہ اس کرپٹ نظام نے ملک کو مفلوج کر دیا ہے، سینیٹ الیکشن نے ثابت کیا ہے کہ لوٹ مار اقتدار میں آئی ہے، پاکستان کنگال ہوگیا اور ان کی جائیدادیں بیرون ملک منتقل ہوگئیں۔

شبلی فراز کا کہناتھا کہ ملک کی ترقی کا واحد حل عمران خان ہے۔

اپوزیشن پر تنقید کرتے ہوئے شبلی فراز نے مزید کہا کہ اس الیکشن میں انہوں نے لوٹے ہوئے مال کا خزانہ کھول دیا ہے، عدم اعتماد کی باتوں پر ان کو شرم آنی چاہیے۔

شبلی فراز نے مزید کہا کہ کے پی کے اس بات کا ثبوت ہے کہ عوام تحریک انصاف پر اعتماد کرتے ہیں، اپوزیشن کو ناکامی کا منہ دیکھنا ہوگا، ہمارے تمام امیدوار جیت چکے ہیں۔

انہوں نے کہا کہ اپوزیشن میں اب مفادات کی جنگ شروع ہو چکی ہے، پی ڈی ایم کے اختلاف سے ہمیں ووٹ زیادہ ملے ہیں۔