وزیراعظم کی زیر صدارت وفاقی کابینہ کا اہم اجلاس کل ہوگا


ثمرا مظہرویب ایڈیٹر

08th March, 2021
وفاقی کابینہ
Square ad 300 x 250

وزیراعظم عمران خان کی زیر صدارت وفاقی کابینہ کا اہم اجلاس کل ہوگا۔

تفصیلات کے مطابق کابینہ کے اجلاس میں معاشی، سیاسی اور سیکیورٹی صورتحال کا جائزہ لیا جائے گا۔

ذرائع کے مطابق وفاقی کابینہ کے اجلاس میں سینیٹ انتخابات سے متعلق امور اور اعتماد کے ووٹ پر بات ہوگی، کابینہ پی ڈی ایم کے لانگ مارچ سمیت اہم قومی معاملات پر غور کرے گی۔

اس کے علاوہ وفاقی کابینہ چیئرمین سینیٹ کے انتخابات سے متعلق صادق سنجرانی کے لئے ووٹ لینے کی حکمت عملی طے کرے گی۔

ذرائع نے بتایا کہ وفاقی کابینہ کے اجلاس میں 16 نکاتی ایجنڈے پر بھی غور ہوگا، کابینہ براڈ شیٹ اسیکنڈل کے تحقیقاتی کمیشن کےچیئرمین اور ممبرز کی تنخواہ و مراعات کی منظوری دے گی۔

اس کے علاوہ آرٹیلری رجمنٹ کے میجر ندیم انجم کی ریٹائرمنٹ کی شق کی تبدیلی کی منظوری دی جائے گی۔

ذرائع کے مطابق وفاقی کابینہ کو میٹرو بس اسلام آباد منصوبے پربریفنگ دی جائے گی۔

اجلاس میں پاکستان انسٹی ٹیوٹ آف ایجوکیشن بل کا ڈرافٹ کابینہ میں پیش ہوگا،کابینہ اجلاس میں اسٹیٹ بنک پاکستان ترمیمی بل 2021 کی منظوری دی جائےگی۔

کابینہ سارک کورونا ایمرجنسی فنڈ میں امداد کی منظوری دے گی۔ اجلاس میں نیپرا ایکٹ کے تحت اپیلٹ ٹربیونل کے ممبر فنانس کی منظوری دی جائے گی۔

اجلاس میں اوورسیز ایمپلائمنٹ پروموٹرز کے نئے لائسنس کے اجراء سے متعلق ایجنڈے پر بات ہوگی۔

ذرائع کا کہناہے کہ کابینہ این ٹی ڈی سی کے ایم جی کی تعیناتی کی منظوری دے گی،پی ایس کیو سی اے میں ڈپٹی ڈائریکٹر جنرل فنانس کی ڈیپوٹیشن پر تقرری کی منظوری بھی دی جائے گی۔

اجلاس میں کابینہ کمیٹی برائے سی پیک کے 3 فروری کے فیصلوں کی توثیق ہوگی، کابینہ کمیٹی انرجی کے 11 فروری کے فیصلوں کی توثیق کی جائے گی۔

اجلاس میں کابینہ اقتصادی رابطہ کمیٹی کے 19 فروری کے فیصلوں کی توثیق کرے گی۔