وفاقی وزیر منصوبہ بندی اسد عمر نے کہا ہے کہ گلگت بلتستان کے نوجوانوں اور لوگوں کے لئے زیادہ سے زیادہ روزگار کے مواقع پیدا کئے جائیں گے۔

تفصیلات کے مطابق وفاقی وزیر منصوبہ بندی اسد عمر کی زیر صدارت گلگت بلتستان ڈویلپمنٹ پلان کے حوالے سے اجلاس ہوا جس میں پن بجلی ، صحت ، تعلیم اور مہارت کی ترقی ، سیاحت ، نجی شعبے کی ترقی ، زراعت ، خواتین کی ترقی ، سماجی بہبود کے منصوبوں پر بھی تبادلہ خیال کیا گیا۔

اجلاس میں وفاقی وزیر کو  پی ایس ڈی پی کے تحت مجوزہ منصوبوں ، پبلک پرائیویٹ پارٹنرشپ اور دیگر منصوبوں پر بریفنگ دی گئی۔

اس موقع پر گلگت بلتستان حکومت نے علاقے میں بجلی کے  بحران کو کم کرنے جبکہ سیاحت ، معدنیات ، زرعی شعبے اور مواصلات کی ترجیحات پر روشنی ڈالی۔

وفاقی وزیر منصوبہ بندی اسد عمر نے اجلاس کی صدارت کرتے ہوئے کہا کہ گلگت بلتستان ڈویلپمنٹ پیکیج کا مقصد نہ صرف توانائی پیدا کرنا ہے بلکہ ریگولیٹری فریم ورک اور جنریشن ٹرانسمیشن کی تقسیم کی صلاحیت کو بھی بہتر بنانا ہے۔

اسد عمر نے یہ بھی کہا کہ گلگت بلتستان کے پاور سیکٹر کا اپنا ایک علاقائی گرڈ ہونا چاہیے، وزارت آئی ٹی اور پی ٹی اے گلگت بلتستان میں تھری جی اور فور جی لائسنسوں کی نیلامی کو ترجیحی بنیادوں پر حتمی شکل دے۔

وفاقی وزیر منصوبہ بندی اسد عمر نے مزید کہا کہ گلگت بلتستان کے نوجوانوں اور لوگوں کے لئے زیادہ سے زیادہ روزگار کے مواقع پیدا کئے جائیں گے جبکہ دور دراز علاقوں میں معاشی سرگرمیاں پیدا کرنا مستقبل میں آئی ٹی کے مضبوط ڈھانچے کے ذریعے ہی ممکن ہوسکے گا۔

اجلاس میں سی ایم گلگت بلتستان خالد خورشید، متعلقہ وزارتوں کے اعلیٰ حکام، چیئرمین این ایچ اے اور دیگر نے شرکت کی۔