وزیراعلیٰ پنجاب سردارعثمان بزدار نے کہا ہے کہ کورونا کی تیسری لہر خطرناک صورتحال اختیار کرچکی ہے، کورونا کے باعث پوری دنیا کو نئے چیلنج کا سامنا ہے۔

تفصیلات کے مطابق وزیراعلیٰ پنجاب عثمان بزدار سے صوبائی وزیر اوقاف پیر سید سعیدالحسن شاہ نے ملاقات کی ہے جس میں اتحاد و یگانگت اور مذہبی ہم آہنگی کے فروغ کیلئے اقدامات پر تفصیلی بات چیت کی گئی ہے۔

اس موقع پرعثمان بزدار کا کہناتھا کہ وطن عزیز کے مسائل کا حل اتحاد و اتفاق میں مضمر ہے، پاک دھرتی کی مٹی ہم سب سے بھائی چارے، مذہبی رواداری اور بین المذاہب ہم آہنگی کا تقاضہ کرتی ہے، سب کو وطن کا یہ قرض اتارنے کیلئے اپنا فرض ادا کرنا ہوگا۔

عثمان بزدار نے کہا کہ کورونا کے پیش نظر ہیلتھ سسٹم پر دباؤ بڑھ رہا ہے،موجودہ حالات میں بہت زیادہ احتیاط اور ماسک پہننا ضروری ہے۔

انہوں نے کہا کہ اپوزیشن کورونا کے دوران بھی اپنی منفی سیاست سے باز نہیں آئی، یہ وقت سیاست کا نہیں،سیاست کیلئے بہت وقت ہے لیکن اس وقت دکھی انسانیت کے ساتھ کھڑے ہونے کی ضرورت ہے۔

عثمان بزدار نے کہا کہ اپوزیشن جماعتوں کو نازک حالات میں ہوش کے ناخن لینے چاہئیں، مشکل وقت میں قوم کو تنہا چھوڑنے والی اپوزیشن اب خود تنہا ہو چکی ہے۔

وزیراعلیٰ عثمان بزدار نے مزید کہا کہ وزیراعظم عمران خان کی قیادت میں کورونا کے قومی چیلنج سے مؤثر انداز میں نمٹا جا رہا ہے۔