وزیراعظم عمران خان نے کہا ہے کہ پاکستان اور ہنگری کے درمیان مضبوط معاشی اور دو طرفہ تعلقات ہیں۔

تفصیلات کے مطابق ہنگری کے وزیر خارجہ کی وزیراعظم عمران خان سے ملاقات ہوئی جس میں کورونا وائرس کی صورتحال کے حوالے سے بات چیت کی گئی۔

ملاقات میں وزیراعظم نے تجارت،انرجی،آبی وسائل،زراعت، سائنس اینڈ ٹیکنالوجی سمیت مختلف شعبوں میں تعاون بڑھانے پر زور دیا۔

اس موقع پر وزیراعظم عمران خان نے کہا کے پاکستان میں ہم نے نہ صرف عوام کو وائرس سے محفوظ رکھنے کیلئے اقدامات کئے بلکہ انہیں معیشت پر ہونے والے منفی اثرات کے بعد بھوک کے ہاتھوں مرنے سے بھی بچانے کیلئے کوششیں کیں۔

وزیراعظم نے ہنگری کی کاروباری برادری پر زور دیا کہ وہ کاروبا ر دوست ماحول کا فائدہ اٹھاتے ہوئے پاکستان میں مزید سرمایہ کاری کریں۔

عمران خان نے افغانستان کے حوالہ سے گفتگو کرتے ہوئے کہا کہ افغانستان میں تنازعہ کا کوئی فوجی حل نہیں ہے اور صرف بات چیت کے ذریعے مسئلہ کا سیاسی حل ہی آگے بڑھنے کا واحد راستہ ہے۔

وزیراعظم نے افغانستان سے ذمہ دارانہ انخلاء اور سیاسی حل کیلئے افغان جماعتوں کی طرف سے تیز پیشرفت کی ضرورت پر زور دیا۔

عمران خان نے کہا کہ افغانستان میں امن و استحکام کے تجارت اور علاقائی روابط کے فروغ سمیت بہت سے اہم اثرات مرتب ہوں گے۔

ملاقات میں ہنگری کے وزیر خارجہ نے پر تپاک خیر مقدم پر وزیراعظم عمران خان کا شکریہ ادا کیا اور ہنگری کے وزیراعظم کی طرف سے نیک خواہشات پہنچائیں۔

ہنگری کے وزیر خارجہ نے وزیراعظم کو اپنی حکومت کی خارجہ پالیسی اور اقتصادی ترجیحات کے بارے میں بھی آگاہ کیا۔

انہوں نے کہا کہ ہنگری پاکستان سے معاشی تعلقات بڑھانے کا خواہاں ہے، ہنگری کے بڑے تاجر پاکستان میں کاروباری مواقعوں کی تلاش میں ہیں۔

ملاقات میں وزیراعظم عمران خان نے ہنگری کے وزیراعظم کو پاکستان کے دورہ کی دعوت دی جبکہ ہنگری کے وزیر خارجہ نے بھی وزیراعظم عمران خان کو ہنگری کے دورہ کی دعوت دی۔