جنوبی افریقا کے خلاف دوسرے ون ڈے میچ میں فخر زمان کے رن آؤٹ کے معاملے پر انٹرنیشنل کرکٹ کونسل (آئی سی سی) نے کوئنٹن ڈی کاک کو کلین چٹ دے دی۔

رپورٹس کے مطابق آئی سی سی میچ آفیشلز کی جانب سے رن آوٹ کی ویڈیو دیکھ کر فیصلہ کیا گیا ہے کہ کوئنٹن ڈی کاک نے کسی بھی قانون کی خلاف ورزی نہیں کی ہے۔

میچ آفیشلزنے بیان جاری کرتے ہوئے کہا کہ ڈی کاک نے فیلڈر کو نان اسٹرائیکر اینڈ پر گیند پھینکنے کا اشارہ کیا تھا۔

خیال رہے کہ گزشتہ روز جنوبی افریقا کے خلاف دوسرے ون ڈے میچ میں فخرزمان آخری اوور کی پہلی گیند پر اس وقت آؤٹ ہوگئے جب پاکستان کو 6 گیندوں پر 31 رنز کی ضرورت تھی۔

فخر زمان اور حارث رؤف  بیٹسمین دوسرا رن مکمل کرنے کی کوشش کر رہے تھے، اور وکٹ کیپر ڈی کوک نے بولر والی سائیڈ کی طرف اشارہ کیا، فخر زمان اپنی کریز میں پہنچنے والے تھے، لیکن ڈی کوک کا اشارہ دیکھ کر وہ آہستہ ہوگئے۔

فیلڈر ایڈن مارکرم نے وکٹ کیپر کی طرف تھرو پھینکا جو سیدھا وکٹوں میں لگا اور فخر زمان193 پر آؤٹ ہوگئے۔

بعدازاں، ایم سی سی کے ٹویٹر ہینڈل سے کرکٹ کے متعلق ایک قانون بھی شیئر کیا گیا۔ اس رن آؤٹ کے بعد بحث یہ ہے کہ ڈی کوک نے جان بوجھ کر غلط اشارہ کیا کہ گیند بالر کی طرف پھینکی جا رہی ہے، غلط اشارے سے فخر زمان نے اپنی رفتار آہستہ کی اور آوٹ ہوگئے۔