وزیراعلیٰ پنجاب سردار عثمان بزدار نے کہا ہے کہ مری کو پاکستان کے مرکزی سیاحتی مقام ہونے کا اعزاز حاصل ہے۔
تفصیلات کے مطابق وزیراعلیٰ پنجاب سردار عثمان بزدار نے مری میں کوہسار یونیورسٹی اور دیگر منصوبوں کا سنگ بنیاد رکھنے کی تقریب سے خطاب کیا ہے۔
عثمان بزدار نے کہا کہ تحصیل کہوٹہ ، کوٹلی ستیاں اور کلرسیداں کے بوائز اور گرلز کالجز کی اپ گریڈیشن کا بھی سنگ بنیاد رکھا گیا ہے۔
عثمان بزدار نے کہا کہ سیاحوں کی بہت بڑی تعداد مری کا رخ کرتی ہے جس کی وجہ سے ٹریفک اوردیگر مسائل کا سامنا کرنا پڑتا ہے اور ان مسائل کے ازالے کے لئے کوٹلی ستیاں کو بھی مری کی طرز پر سیاحتی مرکز کے طور پر ڈویلپ کیا جا رہا ہے۔
عثمان بزدار نے یہ بھی کہا کہ نئے ٹورازم سینٹر سے سیاحت کو فروغ ملے گا ، علاقے میں ترقی اورخوشحالی آئے گی اور مقامی لوگوں کے لئے روزگار کے مواقع پیدا ہوں گے۔
انہوں نے کہا کہ تحریک انصا ف کی حکومت مری اور گرد ونواح میں سیاحوں کو بہترین سہولتیں فراہم کرنے کے لئے کوشاں ہیں۔
عثمان بزدار کا کہنا تھا کہ ٹورازم کے فروغ کے لئے مری کے ترقیاتی منصوبوں پر 7 ارب 80 کروڑ روپے لاگت آئے گی اور ان پراجیکٹس کی تکمیل سے نہ صرف سیاحوں بلکہ مری کے رہائشیوں کو بھی سہولت ہوگی۔
عثمان بزدار نے کہا کہ عوام کے دیرینہ مطالبے پر میونسپل کمیٹی مری کو میونسپل کارپوریشن کا درجہ دیا گیا ہے اور انتظامی امور میں بہتری کے لئے ایڈیشنل ڈپٹی کمشنر اور نئے ایس پی کو بھی تعینات کیا گیا ہے۔
انہوں نے کہا کہ مری کے پہاڑی علاقوں کے عوام کے لئے صحت کی بہترین سہولتیں فراہم کرنا ہماری ترجیحات میں شامل ہے جبکہ کہوٹہ کے تحصیل ہیڈ کوارٹر اسپتال کی ایمرجنسی کو بھی اپ گریڈ کیا جائے گا۔
انہوں نے یہ بھی کہا کہ ڈائلسز یونٹ اور ٹراما سینٹر بھی بنائے جائیں گے۔
عثمان بزدار کا کہنا تھا کہ مری میں سیاحوں کے لیے پارکنگ کا بھی بہت بڑا مسئلہ ہے اس لئے سیاحوں کی سہولت کے لئے جھیکا گلی میں پارکنگ پلازہ بنایا جا رہا ہے تاکہ روڈ سائیڈ پارکنگ کی وجہ سے سیاحوں کو کسی قسم کی دشواری کا سامنا نہ ہو۔
عثمان بزدار نے یہ بھی کہا کہ مری اوراس کے مضافات میں پانی کی فراہمی اورنکاسی آب کے مسائل عرصہ دراز سے حل طلب ہیں تاہم عوام اور سیاحوں کی ضروریات کو مد نظر رکھتے ہوئے ٹورسٹ ہائی ویز اور فراہمی و نکاسی آب کے پراجیکٹ بھی لائیں گے۔
عثمان بزدار کا کہنا تھا کہ ہماری توجہ مری کے مضافاتی علاقوں میں سہولتوں کی فراہمی پر ہے تاکہ انہیں سیاحتی مقام کے طور پر ترقی دی جا سکے جبکہ ٹورسٹ ایریا میں ٹریفک کی آسانی سے آمد و رفت یقینی بنانے کے لئے نئے داخلی اور خارجی روٹ بنانے کی تجویز کو قابل عمل بنانے پر بھی کام ہو رہا ہے۔
عثمان بزدار نے کہا کہ آنے والے وقت میں ہم راولپنڈی اورمری سمیت پنجاب کے چھوٹے بڑے شہروں کے لئے بھی مزید ترقیاتی منصوبے لائیں گے۔
عثمان بزدار نے یہ بھی کہا کہ ہر ضلع کے لئے الگ ڈسٹرکٹ ڈویلپمنٹ پیکیج دیا جارہا ہے جبکہ اضلاع میں یونیورسٹیوں کے قیام کے منصوبے پر بھی پیش رفت جاری ہے۔
عثمان بزدار کا مزید کہا تھا کہ ہمارا مشن عوام کی خدمت اورفلاح وبہبود ہے ،وزیراعظم عمران خان کی قیادت میں ہم اپنے مشن کو جاری رکھیں گے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News