تربوز کو گرمی کا توڑ کرنے والا پھل قرار دیا جاتا ہے، یہ  ایک ایسا پھل ہے جسے موسم گرما کا تحفہ قرار دیاجاتا ہے۔

تربوز کو ہر زبان میں مختلف ناموں سے پکارا جاتا ہے پنجابی میں ہندوانہ ، انگریزی میں واٹر میلین ، عربی میں بطیخ ، اور ترکی میں تاجور کہتے ہیں۔تربوز تقریباً دنیا کےہر علاقے میں پایا جاتا ہے لیکن خاص طور پر پاکستان ، ہندوستان ، ایران ،شمالی بنگال ، صوبہ سرحد اور افغانستان میں اس کی کاشت کی جاتی ہے۔

صحت کے لئے مفید اس پھل کاغالب حصہ پانی پر مشتمل ہوتا ہے جبکہ اس میں حیاتین اور معدنی اجزاء بھی پائے جاتے ہیں۔ ماہرین تربوز کی غذائیت سے متعلق کہتے ہیں کہ اس قدرتی پھل میں 90فیصدپانی اور 10فیصدفولاد،پوٹاشیم،سوڈیم، کیلشیم،فاسفورس، نشاستہ اور روغنی اجزاء شامل ہیں ۔

مگر ایک تربوز کو خریدنا انتہائی مشکل کام ہوتا ہے کیونکہ خریدار کو پتہ نہیں ہوتا کہ وہ میٹھا نکلے گا یا اسکے پیسے ضائع ہونگے۔

تربوز عام طور پہ بہت بڑے ہوتے ہیں اور اگر پھل فروش کاٹ کر نہ دکھائے تو جاننا لگ بھگ ناممکن ہوتا ہے کہ اندر پھل کیسا ہوگا۔

اگر آپ میٹھا اور پکا ہوا تربوز خریدنا چاہتے ہیں تو آپ چند چیزوں کے بارے میں جان لیں تو آپ پھل کو کاٹ کر دیکھے بغیر بھی اس کے بارے میں درست بتاسکتے ہیں۔

زرد نشان کو دیکھیں

کسی تربوز کے پکے ہوئے ہونے کی یہ نشانی ہوتی ہے کہ اس پر موجود زرد رنگ کا ایک نشان یا دھبہ ہوتا ہے جس سے اشارہ ملتا ہے کہ یہ پکا ہوا اور  میٹھا ہے تاہم اگر یہ نشان نہ ہو تو اس کا مطلب ہے کہ یہ تربوز کھانے کے لیے ابھی پکا نہیں۔

زیادہ وزنی

تربوز جتنا وزنی ہوگا اتنا ہی میٹھا ہوگا،اگر آپ تربوز کو اٹھائیں اور وہ بہت وزنی محسوس ہو یعنی دیکھنے کے مقابلے میں زیادہ بھاری محسوس ہو تو سمجھ لیں کہ آپ نے درست پھل کو چن لیا ہے۔

بجا کر دیکھیں

تربوز کو لینے سے پہلے ہلکے سے ہاتھ سے بجا کر دیکھیں اور اگر وہ آواز کرخت یا کسی چیز کو ٹھونکنے جیسی لگے تو اسے نہ لیں تاہم اگر یہ آواز ایسی ہو جیسے تاروں کو چھیڑا گیا ہو تو اسے چن لیں۔