آرمی چیف جنرل قمر جاوید باجوہ نے کہا ہے کہ پاک روس تعلقات انتہائی اہمیت کے حامل ہیں۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق آرمی چیف جنرل قمر جاوید باجوہ کی روسی وزیر خارجہ سے ملاقات ہوئی جس میں افغان امن کے حوالے سے تبادلہ خیال کیا گیا۔

ترجمان پاک فوج نے بتایا کہ جی ایچ کیو میں ہونے والی ملاقات میں باہمی دلچسپی امور اور پاک روس دفاعی و سیکیورٹی تعاون کے فروغ سے متعلق امور پر بھی بات چیت کی گئی۔

ملاقات میں روسی وزیر خارجہ نے دہشتگردی کی جنگ میں پاکستان کی کامیابیوں کو تسلیم کیا جبکہ خطے کے امن و استحکام خاص کر افغان امن عمل کے لیے پاکستان کی مخلصانہ کوششوں کو سراہا۔

اس موقع پر روسی وزیر خارجہ نےآرمی چیف سے گفتگو کرتے ہوئے کہا کہ پاک روس تعلقات ایک مثبت راہ پر گامزن ہیں اور متعدد ڈومینز میں ترقی کرتے رہیں گے۔

ملاقات میں آرمی چیف جنرل قمر جاوید باجوہ نے کہا کہ پاکستان روس کے ساتھ اپنے تعلقات کو قدر کی نگاہ سے دیکھتا ہے اور دوطرفہ فوجی تعاون میں اضافے کا خواہاں ہے۔

جنرل قمر جاوید باجوہ نے یہ بھی کہا کہ  پاکستان ان تمام اقدامات کا خیرمقدم کرتا ہے جو افغانستان میں امن و استحکام لاسکتے ہیں کیونکہ اس سے پورا خطہ مستفید ہوگا۔

آرمی چیف جنرل قمر جاوید باجوہ نے مزید کہا کہ ہم خودمختاری مساوات اور باہمی ترقی پر مبنی ایک علاقائی فریم ورک کی سمت کام کرتے رہیں گے۔