پاکستان پیپلزپارٹی کے رہنما شرجیل میمن کی روشن سندھ کیس میں ضمانت کا تفصیلی فیصلہ جاری کردیا گیا ہے۔

اسلام آباد ہائیکورٹ کے چیف جسٹس اطہر من اللہ نے آٹھ صفحات پر مشتمل فیصلہ جاری کیا۔

عدالتی فیصلے میں کہا گیا کہ شرجیل میمن دو سال گرفتار رہے، نیب سے اب بھی تفتیش میں تعاون کر رہے ہیں، اس سٹیج پر شرجیل میمن کو قید کرکے آزادی چھین لینا ناانصافی ہوگی۔

عدالتی فیصلے میں کہا گیا کہ شرجیل میمن اگر تفتیش میں تعاون نہ کریں تو نیب ضمانت منسوخی کیلئے رجوع کر سکتا ہے۔

عدالتی فیصلے میں کہا گیا کہ شرجیل میمن کا نام بھی ای سی ایل میں ہے، ملک سے فرار ہونے کا امکان بھی نہیں ہے۔

فیصلے میں کہا گیا کہ جعلی اکاؤنٹس میں رقوم جمع کرانے میں شرجیل میمن کا کردار ابھی مزید قابل تفتیش ہے، سندھ ہائیکورٹ سے ایک کیس میں ضمانت ہوتے وقت اس کیس میں وارنٹ جاری کر دیئے گئے، خارج از امکان نہیں یہ وارنٹس محض شرجیل میمن کو ہراساں کرنے کے لیے جاری کئے گئے ہوں۔

فیصلے میں مزید کہا گیا کہ نیب نے کہا شرجیل میمن اثاثوں سے متعلق معلومات فراہم نہیں کر رہے، عدالتی استفسار پر پتہ چلا نیب نے ایف بی آر سے ریکارڈ تک حاصل نہیں کیا۔

عدالتی فیصلے میں کہا گیا کہ نیب کے مطابق شرجیل میمن سے چیکس لیکر ایک کمپنی کے ملازم نے جعلی اکاؤنٹس میں جمع کرائے، نیب نے چیکس وصول کرنے والے اس ملازم کو گرفتار ہی نہیں کیا۔

خیال رہے کہ اسلام آباد ہائیکورٹ نے گزشتہ برس شرجیل میمن کی ضمانت کا مختصر  فیصلہ سنایا تھا۔