وزیر اعظم عمران خان نے کہا ہے کہ عوام کے لئے آٹے کی بلا تعطل فراہمی ہماری اولین ترجیح ہے۔

تفصیلات کے مطابق وزیر اعظم عمران خان سے فلور ملز ایسوسی ایشنز کے موجودہ اور سابقہ چئیرمین و نمائندگان کے وفد کی ملاقات ہوئی جس میں آٹے کی فراہمی اور مناسب قیمتوں پر دستیابی کے حوالے سے مختلف تجاویز پر غور کیا گیا ہے جبکہ مستقبل کے لائحہ عمل کے حوالے سے بھی گفتگو کی گئی ہے۔

وفد نے وزیراعظم عمران خان کا  فلور ملز نمائندگان کے مسائل حل کرنے کے حوالے سے ملاقات پر شکریہ ادا کیا ہے۔

ملاقات میں وفد نے ملک میں گندم کی بروقت فراہمی اور عوام الناس کو آٹے کی مناسب قیمتوں میں دستیابی پر تجاویز دی ہیں اور گندم کی بین الصوبائی نقل و حرکت کو مزید سہل بنانے کے حوالے سے بھی مختلف تجاویز پیش کی ہیں۔

وفد کا کہنا تھا کہ اس سال گندم کی فصل بہت حوصلہ افزاء ہے ،امید ہے کہ اہداف اور تخمینوں کے مطابق گندم کی پیداوار حاصل ہو گی۔

اس موقع پر وزیراعظم نے کہا کہ فلور ملز نمائندگان کی جانب سے دی جانے والی تجاویز کا جائزہ بھی لیا جائے گا۔

عمران خان نے مزید کہا کہ حکومت تمام اسٹیک ہولڈرز کی مشاورت سے ہر ممکن اقدامات اٹھائے گی۔

اس موقع پر صوبہ پنجاب، صوبہ خیبر پختونخواہ، صوبہ سندھ کی فلور ملز ایسوسی ایشن کے عہدیدار جبکہ شوکت فیاض ترین، خسرو بختیار، فخر امام، ڈپٹی اسپیکر قومی اسمبلی قاسم خان سوری ،مشیر وزیر اعظم عبدالرزاق داؤد ، جمشید اقبال چیمہ اور اعلیٰ افسران بھی شریک ہوئے۔